La Xunta denuncia nuevos casos de discriminación

La Xunta pola Defensa de la Llingua Asturiana tien que volver a denunciar nuevos casos de discriminación llingüística na enseñanza. Sigún l’asociación a la situación de marxinación que carez la llingua asturiana nel sistema educativu, llendada a una asignatura voluntaria en primaria y optativa en secundaria, súmense los cientos de casos d’estudiantes a los que, tovía depués d’escoyer l’asignatura d’asturianu, se-yos niega’l derechu a cursala.

La Xunta pola ta acabante de comprobar que “la dirección del Institutu de Pando n’Uviéu niega la posibilidá de cursar l’asignatura de Llingua Asturiana a 7 alumnos que la escoyeron como primer optativa na matrícula pa esti cursu. Nun primer momentu la dirección del centru llegó a dicir a los alumnos qu’en Bachilleratu nun yera obligatorio ufiertar l’asignatura, a la fin reconocen que se reordena a los estudiantes n’otres asignatures pa que d’esta manera se cubran los mínimos a los que nun llegaben. Esta situación nun ye nueva nesti institutu, nos tres últimos años tampoco nun hebo grupu d’asturianu.”

La situación repítese de forma asemeyada notros centros: “nel institutu de Turón quitóse un grupu d’asturianu con tres matriculaos. Nel institutu de Candás nun dexen matriculáse a un alumnu d’ESO por nun tener garrada l’asignatura en primeru y segundu; otru, por escoyer asturianu como optativa en cuenta del francés, foi espulsáu d’educación billingüe (n’inglés)”.

La Xunta pola Defensa de la Llingua Asturiana quier denunciar “qu’estes situaciones repítense cada añu nel entamu del cursu escolar ensin que la inspección educativa faga nada por evitalo. Como cada añu, la Conseyería d’Educación y les direcciones de dalgunos centros incumplen la llei sistematicamente, negando’l derechu a estudiar asturianu a cientos d’estudiantes de toles etapes que lo piden voluntariamente”.