La Xunta demanda una estratexa pa la erradicación del plumeru de la pampa

A propuesta d’IX, los grupos parlamentarios de la Xunta Xeneral aprobaron esta mañana, por unanimidá, pidir la ellaboración d’una estratexa de erradicación del plumeru de la pampa, la “cortaderia selloana” qu’invade les carreteres d’Asturies dende va tiempu.

El diputáu d’IX, Ovidio Zapico, responsable d’Infraestructures y Medioambiente nel grupu parlamentariu, demandó esta mañana la ellaboración, de manera inmediata y antes de rematar el presente periodu de sesiones, d’una estratexa de erradicación de la especie invasora “cortaderia selloana”, más conocía como plumeru de la pampa, de tolos tarrenes y les infraestructures que dependan de la comunidá autónoma y a establecer un alcuerdu de collaboración col Estáu pa llograr esi mesmu oxetivu naquellos dependientes de l’Alministración central. De la mesma, pidió voluntá política pa resolvelo y asignación de recursos na prórroga presupuestaria, tal como taba previsto nel proyectu de presupuestos sofitáu por IX y finalmente retiráu.

Pal diputáu d’IX la negativa presencia d’esta planta nos ecosistemes naturales ta fora de toa dulda. A xuiciu d’IX ye necesario tomar midíes urxentes pa dar en la so erradicación y que les distintes alministraciones “dexen de pasase la pelota de la responsabilidá”, como yá asocedió na anterior llexislatura.

Cualquier plan de choque que pueda ponese en marcha pa combatir esta o cualesquier otra especie invasora ha cuntar  cola coordinación ente’l Principáu y el Gobiernu central, pero tienen d’incorporase tamién a esti plan los conceyos, los distintos organismos públicos con competencies na so erradicación como pueden ser la Confederación Hidrográfica o Adif, alvirtió Ovidio Zapico, quien recordó que les granes d’esta planta son capaces de treslladase col vientu a distancies de 30 kilómetros.

Asturies, que yá cunta con trabayos previos de erradicación de plantes alóctones invasores, tendría de rellanzar esti tipu d’estudios y la so aplicación y nun conformase cola aprobación d’esta Proposición Non de Llei, dixo’l diputáu d’IX na comisión de Desenvolvimientu Rural.