La Xunta de Toponimia revisa los nomes de llugar de Llanes, na so primer reunión fuera d’Uviéu

La Xunta de Toponimia viaxa a Llanes. L’organismu asesor, ensertáu nel organigrama de la Conseyería de Cultura, Comunicación Social y Turismu, cellebró güei nesa villa del Oriente la so primer xuntanza de trabayu fuera d’Uviéu, col envís d’acabar de revisar los nomes de llugar de Llanes y la participación de dos altos cargos del Principáu: los directores xenerales de Política Llingüística, Carlos Madera, y d’Alministración Llocal, Valentín Ruiz.

El primeru d’ellos preside la Xunta acordies cola regulación por llei d’esi organismu, mientres que Ruiz, qu’ocupa una de les vocalíes tamién por mandáu llegal, tomó parte tamién d’una comparecencia pública posterior a la reunión de la Xunta, la primera convocada espresamente p’asoleyar el llabor d’esti organismu asesor dende la so puesta en marcha, hai agora cuatro meses.

Nesi periodu de tiempu, la Xunta Asesora de Toponimia del Principáu d’Asturies recibió les solicitúes de doce conceyos que quieren recuperar a tolos efectos los sos nomes tradicionales de llugar n’asturianu. Los primeros dos espedientes, los correspondientes a Carreño y El Franco, yá tán remataos, mientres que’l de Llanes pesllaráse na xuntanza de güei y l’informe sobro L.lena podría empezar a iguase tamién na xuntanza d’esta mañana. Si ye asina, entá quedarán pendientes les peticiones d’otros ocho municipios: Mieres, Casu, Llangréu, Xixón, Castrillón, Ayer, Siero y Gozón.

Nesi procesu nun participará L’Academia de la Llingua, qu’ayeri tuvo ausente por primer vegada nes reuniones de la Xunta de Toponimia y que yá anunciara, tal como adelantó Asturnews el pasáu 19 d’agostu, el so distanciamientu del organismu al considerar que’l llabor que-y correpuende nél “ya ta fechu y plasmáu” nel nomenclátor de conceyos, parroquies, pueblos y llugares editáu pola institución académica nel añu 2000.

Acordies con esi plantegamientu, l’alcaldesa de Xixón, la socialista Paz Fernández Felgueroso, y la presidenta de L’Academia, Ana Cano, firmaron el pasáu xueves un conveniu pol que la entidá académica comprométese a asesorar al Consistoriu particularmente nel bon usu de los topónimos del conceyu.

La Xunta de Toponimia podrá elevar al Gobiernu los primeros informes definitivos a partir d’ochobre