La Xunta convoca una concentración una concentración delantre la Escuela de Maxisteriu esti martes 31 a les 16 hores

Esti prósimu martes 31 de marzu la Xunta d’Escuela de Maxisteriu va aconceyar con un únicu puntu de debate, la presencia de la llingua asturiana nos nuevos planes d’estudios qu’han aprobase pal procesu de converxencia del marcu européu de Bolonia y la Xunta pola Defensa de la Llingua convoca esi día a les 16 hores una concentración delantre esa Escuela pa amosar la posición favoratible de la sociedá asturiano alrodiu d’esta decisión.

La dirección de la Escuela de Maxisteriu yá llevó a votación, el 29 de xineru, la so primer propuesta de planes d’estudiu qu’escluíen a los estudios de llingua asturiana y dexaben ensin posibilidá de formación a los futuros mayestros y mayestres d’asturianu. D’aquella, la so propuesta foi refugada por una mayoría amplísima 48 contra 23. Lo que nun foi abondo pa que la directora Gloria Tellez presentara la dimisión, nin tan siquiera que reconsiderara la so posición no tocante al asturianu.

Mesmo’l Rector Vicente Gotor como’l Conseyeru d’Educación Iglesias Riopedre defendieron la necesidá d’incluir los estudios de llingua asturiana nos nuevos planes. De lo contrario, la Escuela de Maxisteriu declararíase insumisa a la llexislación vixente:

– La Llei 1/98 d’Usu y Promoción del Asturianu recueye nel so capítulu d’enseñanza’l derechu al estudiu del asturianu nel sistema educativu y qu’ha ser la Universidá d’Uviéu la qu’ha garantizar pa ello la formación de los docentes de Llingua Asturiana. – El Currículo pa la Educación Primaria n’Asturies afita la presencia de l’asignatura voluntaria de Llingua Asturiana qu’angüañu escueyen voluntariamente más de vente mil escolinos y escolines. Por too ello, la formación de los futuros profesionales de la enseñanza esixe: La creación d’una Mención de Llingua Asturiana. Que permita la formación de los futuros mayestros y mayestres de Llingua Asturiana. La presencia d’asignatures de Llingua Asturiana nos estudios comunes d’Educación Infantil y Primaria. Que permita la formación mínima necesaria pa que cuanquier futuru mayestru o mayestra pueda desarrollar la so actividá docente na realidá sociollingüística d’Asturies, garantizando la igualdá de derechos llingüísticos y educativos de los neños y neñes falantes d’asturianu.

La Xunta pola Defensa de la Llingua Asturiana quier animar a tola sociedá asturiana a movilizase na defensa del nuesu patrimoniu llingüísticu y de los derechos llingüísticos y educativos más básicos. Convocando asinamesmo una concentración el prósimu martes 31 de marzu a les 16:00 delantre la Escuela de Maxisteriu, nel Campus de Llamaquique de la Universidá d’Uviéu.