Portada Educación La Voz de Asturias diz que la carrera pol Rectoráu tendrá a Paz Andrés como candidata amás de Vicente Gotor

La Voz de Asturias diz que la carrera pol Rectoráu tendrá a Paz Andrés como candidata amás de Vicente Gotor

by asturnet

La Voz de Asturias diz na so edición de güei que “la segunda y última vuelta de les elecciones al rectoráu de la Universidá d’Uviéu celebraes n’abril de 2008 volverá reeditase en 20122. Pal diariu “la catedrática de Derechu Internacional Paz Andrés va apostar el cargu a Vicente Gotor nos comicios previstos pal próximu mes d’abril” como afita’l fechu de qu’Andrés foi demientres tol mandatu la cabeza visible de la oposición a la xestión del equipu rectoral, dempués de que los otros dos aspirantes nes elecciones de 2008 –Antonio Cueto y Santos González– volvieren a los sos centros.

Nel diariu nun se dicen les fuentes, magar el rumor lleva corriendo pela Universidá dende va delles selmanes. Según La Voz, a diferencia d’anteriores etapes, esta xera d’oposición de Paz Andrés fízose con una vocación más interna que pública, con crítiques nos Conseyos de Gobiernu y nos claustros. Sicasí, la plataforma de sofitu a Andrés caltuvo abiertu un blogue nel que comuniquen los sos planteamientos.

Según La Voz, el nuevu choque electoral ente Paz Andrés y Vicente Gotor yera un secretu a voces dende va meses, anque dambos paecen actuar con muncho precuru. El rector reconoció en públicu’l pasáu 14 de setiembre la so intención de volver allegar a les elecciones, yá que inda nun escosó’l proyectu col que se presentó en 2008 y tien planes pindios d’executar. A Paz Andrés, sicasí, paez que-y asocede lo contrario. Nun comulga cola xestión que ta faciendo l’actual equipu rectoral y tien inda intactu’l planteamientu d’Universidá qu’espunxo a la comunidá universitaria fai más de tres año. LA VOZ intentó ayeri ensin ésitu ponese en contactu cola catedrática pa conocer los sos planteamientos pero foi imposible, al atopase fora de la rexón.

La Voz de Asturias tamién fai un resume del currículum de la futurible candidata: “L’aspirante a ocupar el rectoráu ye una uvieina, llicenciada y doctorada en Derechu pola Universidá d’Uviéu, onde desenvolvió tola so carrera académica. Les sos principales llínees d’investigación y les sos publicaciones ocúpense fundamentalmente del Derechu internacional públicu, en temes como’l caltenimientu de la paz y la seguridá, los arreglos pacíficos de los discutinios y tamién del Derechu de la Unión Europea, col sistema institucional y l’ordenamientu xurídicu. Na Universidá d’Uviéu ocupó diversos cargos de xestión, como’l de directora del Centru de Documentación Europea, secretaria xeneral (1986-1988) y tamién vicerrectora d’Estensión Universitaria, ente 2004 y 2005, nos dos primeros años del postreru de Juan Vázquez al frente del rectoráu. La so salida del vicerrectorado marcaron dalgunes de les hores más amargoses de la so carrera, una y bones Vázquez destituyir tres asistir a un homenaxe al ex rector Julio Rodríguez. A pesar del desencuentro, les sos declaraciones siempres fueron prudentes, fuxó del discutiniu y destacó la xestión que desenvolviera”.

Andrés y Gotor son los dos únicos nomes que, enagora, resonen na Universidá, pero entá hai marxe por qu’apaeza dalgún candidatu más

Tamién te podria gustar