Portada Educación La Universidá Popular de Xixón ufre 167 cursos y talleres

La Universidá Popular de Xixón ufre 167 cursos y talleres

by asturnet

El perfil mediu de los matriculaos na Universidá Popular de Xixón, que ñació en 1981, ye una muyer de más de 46 años con estudios de nivel primariu o secundariu. Sicasí, nos cursos pue atopase a xente de toa triba. En total, esti añu van ponese en marcha 167 cursos y talleres, que van entamar el 13 d’ochobre.

Los datos ufríos pol Conceyu de Xixón amuesen que’l perfil del alumnáu de la Universidá Popular ye d’un 64% de muyeres frente a un 36% de varones. Amás, y polo xeneral, les muyeres prefieren los cursos rellacionaos cola educación, les artes plástiques y l’artesanía, la hestoria, el patrimoniu y tamién aquellos conteníos referíos a la salú ente que los homes participen más nos cursos rellacionaos cola agricultura, el medioambiente, la imaxe y el soníu, la informática ya internet.

En cuantes a la edá, el 60% de los alumnos tienen más de 46 años, un 23% tien menos de 35 años y un 17% ta ente los 35 y los 45 años d’edá. Al respective de los estudios el 51% de los alumnos de la UP tienen estudios primarios o secundarios, un 37% tienen estudios universitarios y una pequeña minoría del 2% diz nun tener estudios.

El plazu pa matriculase nos cursos y talleres d’anguaño 2010, ye dende’l 21, 22 y 23 de setiembre hasta’l 8 d’ochobre y va poder facese al traviés de cualesquier oficina d’atención al ciudadanu o cola tarxeta ciudadana entrando na páxina web del Conceyu.

El pagu de los cursos tienen d’efectuase nun plazu máximu de dos díes, esto ye, mientres el día de la inscripción al cursu o a otru día al traviés de los caxeros ciudadanos del Conceyu de Xixón asitiaos nel llugar onde se realiza la matrícula, na rede de caxeros automáticos de Cajastur o al traviés de la web municipal. Otra opción pa la persona interesada en participar en dichos cursos ye solicitar matrícula gratuita con cargu al Fondu de Xornal Municipal. Los requisitos necesarios pa la so concesión según la solicitú tendrá de xestionase nel Centru de Servicios Sociales de la zona na que more dicha persona.

Pa llograr más información sobre los conteníos de los cursos pueden averase a los Centros d’Atención al Ciudadanu onde se vaya a matricular o na web municipal.

Cursos d’asturianu

La ufierta de cursos d’asturianu ta formada por dos opciones. Sedrán nel Vieyu Institutu Xovellanos (CCAI), unu de nivel básicu y otru mediu. Según dan anuncia los docentres d’estos cursos, el básicu entama el 13 d’ochobre y sedrá de llunes a xueves de 19.30 a 21.30. Fináu esti, impartiráse los mesmos díes y nel mesmu horariu, el nivel mediu qu’anicia’l día 15 de payares.

Ufierta completa de cursos de la UP

Tamién te podria gustar