La Universidá organiza una nueva edición de La Nueche de los Investigadores

¿Les solombres son negres realmente? ¿Puede volvese l’agua azul solo con ximelgala? Son dalgunes de les duldes que van poder estenase gracies a los esperimentos a los rapacinos que s’averen a participar en La Nueche de los Investigadores. Mañana vienres, 27 de setiembre, el Palaciu Conde de Toreno (Plaza Porlier, 5) va acoyer la cuarta edición d’esta iniciativa impulsada dende’l Vicerrectorado d’Investigación Campus d’Excelencia Internacional p’averar la ciencia a los neños y los mozos. Casi un millar de neños participaron l’añu pasáu nesta actividá de divulgación científica abierta a tol públicu comenenciudu y dafechu gratuita.

Dende les 18:00 a les 22:00 hores una decena d’investigadores de la Universidá d’Uviéu van desenvolver seis talleres que van averar al públicu visitante esperimentos senciellos que los ayudar a conocer más de cerca dellos fenómenos de la naturaleza.

Biólogos, físicos, xeólogos y químicos van ser los encargaos d’emponer a los más pequenos por dalgunos de los secretos de la naturaleza que los arrodia. A lo llargo de tola tarde los científicos van esplicar conceutos y esperimentos senciellos p’avera-yos a la figura y el trabayu del investigador. Los talleres programaos pa esta edición son: Viaxe al interior del celebru, La enerxía de la lluz, Química y melecines, El color de la Química, Magnetismo… ¡te atrai! y Viaxe al centru de la tierra.

La Nueche de los Investigadores, entamada dende la Unidá de Cultura Científica de la Oficina de Tresferencia de Resultancies de la Investigación, ye una iniciativa de divulgación científica que se va celebrar simultáneamente en 29 ciudaes españoles y que cunta col financiamientu del Séptimu Programa Marco de la UE.