La Universidá d’Uviéu acepta una Memoria de Práctiques redactada n’asturianu

El Conceyu Universitariu pol Asturianu (CUPA), ta acabante anunciar lo qu’albidren “un pasu alantre pal asturianu na Universidá d’Uviéu”. Según la nota unviada por esta organización, ún de los sos miembros presentare una Memoria del Practium de la Diplomatura de Turismu redactada en llingua asturiana. Nun primer momentu, la comisión encargada de la calificación d’esti trabayu imprescindible pa superar la Diplomatura, esixía al alumnu qu’entregare’l mesmu en castellán, pa dalu por válidu, pero dempués d’aclariar a la dirección del centru la llexislación vixente, el trabayu foi aceptáu n’asturianu.

Col asesoramientu del CUPA, l’alumnu en cuestión aconceyó cola dirección de la Escuela Universitaria Xovellanos ya informó de la llexislación vixente, que protexe a los alumnos de la Universidá d’Uviéu, como queda afitao na Llei d’Usu del asturianu de 1998 y nel artículu 6 de los Estatutos de la Universidá d’Uviéu, que diz “naide podrá ser discrimináu pol usu del asturianu na institución”.

A la fin, rellaten dende’l CUPA “la dirección de del centru, atendiendo a la normativa llegal actual sobre la que se-y informó, dio-y la calificación de sobresaliente a la Memoria orixinal, redactada n’asturianu”.

El CUPA felicita nel comunicáu a la Escuela Universitaria Xovellanos de Xixón “pol reconocimientu d’un drechu democráticu, que recueye la llei” y al alumnu en cuestión “por caltenese firme pa que se-y reconozan los sos drechos”. Pal CUPA “ye esta la manera, de qu’esti fechu seya normal nel futuru, y non namás una feliz anécdota”.

Según el Conceyu Universitariu esti casu vien a amosar que “trabayando con seriedá na Universidá y al traviés del diálogu ye posible que se dean avances significativos na reconocencia de los drechos de los estudiantes que quieren usar l’asturianu na so vida diaria”, y tamién “qu’esiste un conflictu abiertu na mesma, qu’ha solucionase cola reconocencia absoluta de la igualdá de drechos pa los usuarios de castellán y asturianu”.

El CUPA anima amás a los alumnos de la Universidá d’Uviéu a que “nun s’autocensuren nel usu de la llingua asturiana, y presenten trabayos y faigan esámenes usando l’asturianu”, pues entienden que la normalización social de la llingua nunca nun se va dar “si los miembros de la comunidá falante nun faen un usu normal de la mesma”. Recuerden dende la organización “qu’en casu de tener cualesquier problema, el CUPA va ufrir el so apoyu lloxísticu y llegal, pa defender el drechu humanu a espresase na llingua materna”.