La UABRA pieslla’l cursu nel Aula Magna esti vienres

La Conseyera d’Educación y Universidaes del Principáu d’Asturies, el Rector de la Universidá d’Uviéu, la Presidenta de l’Academia de la Llingua Asturiana y l’Alcalde de Cangas del Narcea, piesllen oficialmente’l programa d’actividaes de la Universidá Asturiana de Branu (UABRA). L’actu sedrá mañana vienres 16 de setiembre, a les 19:00 hores, nel Aula Magna de la Universidá d’Uviéu (c/ San Francisco), según asoleyara esti día l’Academia de la Llingua nuna nota de prensa.

Nos cursos participaron más d’un centenar de persones nos niveles que s’impartieron: Cursu Elemental de Llingua Asturiana, Cursu Avanzáu de Llingua Asturiana, los Cursos d’Afondamientu Cultural y Llingüísticu Capacitación pa la Traducción al Asturianu, Coses nueves n’internet y asturianu: aplicaciones personales y educatives, Xuegos y tradiciones populares asturianes, Historia d’Asturies: Nueves perspeutives, Cursu d’aniciu a la investigación toponímica y la primer fase del Curso de Capacitación en Gallego-Asturiano.

A lo llargo del actu, que se fairá dafechu n’asturianu, intervendrán la Presidenta de l’Academia, Dña. Ana Mª Cano González, l’Alcalde de Cangas del Narcea, D. José Luis Fontaniella, la Conseyera d’Educación, Dña. Ana Isabel Álvarez y el Rector de la Universidá d’Uviéu, D. Vicente Gotor.