La Tertulia Malory escueye Incorrectos de David Artime como meyor llibru de 2018

La Tertulia Malory vieno acabante escoyer Incorrectos, de David Artime, como’l meyor llibru n’asturianu del añu 2018, esti vienres 21 de xunu nun actu que se celebró nel pub Tom Malory de L’Entregu, sé de la tertulia lliteraria dende 1998.

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2018 la novela Incorrectos, del escritor y periodista David Artime Coto. Sigún comunicó nuna nota de prensa la propia Tertulia, el xuráu tuvo formáu polos escritores Xulio Arbesú, José Luis Rendueles, Solinca Turbón, David Fernán, Roberto Corte, Aique Fernandi, Chechu García y Henrique G. Facuriella, que fallaron el premiu nun actu celebráu na tertulia’l 21 de xunu del 2019.

El xuráu destacó, nel acta del fallu, «l’arquitectura narrativa, el ritmu y la fondura psicolóxica de caún de los personaxes protagonistes d’una obra que va muncho más p’allá de la premisa argumental, al poner al llector énte un espeyu qu’enseña los demonios de la sociedá d’anguaño con un realismu grande», amás de la calidá altísima de la producción lliteraria n’asturianu del añu 2018, lo que fixo que la decisión de premiar la novela d’Artime se garrara por mayoría.

El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu en feches próximes. Esta ye la octava vez que’l grupu concede esti premiu, l’añu pasáu resultó ganador El llibru póstumu de Sherezade, poemariu de Raquel F. Menéndez, y n’ediciones anteriores, premiáronse les obres Lluvia d’agostu, de Francisco Álvarez; L’aire ente la rama, d’Ángeles Carbajal; Más espeso que l’agua, de Consuelo Vega; Carne de melandru, de Milio Rodriguez Cueto; La Chelita, de Ruma Barbero, y La ñeve del Cuquiellu, de Xabiero Cayarga. Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu.

Incorrectos ye la segunda novela de David Artime, depués de la exitosa La bufanda (2010). Col telón de fondu del procesu de reinserción de presos d’ETA y de la violencia na cai de grupos radicales, Incorrectos quier ser un berríu contra la dictadura de lo políticamente correcto al traviés de la historia d’Aníbal, un neonazi violentu y bien conocíu nos ambientes de la estrema derecha madrileña, y Maitane, una militante d’ETA implicada en dos asesinatos. Xuntos entamen a percorrer un camín peligrosu a la busca d’un porvenir dignu: atrás, el so pasáu; delantre, un futuru inciertu. Pero’l que sal de los cánones yá sabe lo que-y queda: la esclusión y el linchamientu.

David Artime Coto (Candás, 1979) ye periodista y escritor. Ganador de dellos premios lliterarios, ye responsable d’una adaptación teatral de la novela José, de Palacio Valdés y de la novela La bufanda (Trabe, 2010), cola que ganó’l Premiu de Narraciones Trabe.