La Tertulia Enrique García Rendueles aldericó sobre’l sistema universitariu

Santiago Fano, voceru del movimientu de les Asamblees d’Estudiantes y miembru del Conseyu d’Estudiantes de la Universidá d’Uviéu, tuvo na Tertulia esplicando la situación qu’anguaño vive la Universidá d’Uviéu. Igualmente fizo un repás del gráu d’organización d’esti movimientu asina como de les sos reivindicaciones y la so llínia d’actuación táctica, dirixida haza una movilización sostenible nel tiempu.

El tema, que ye de gran actualidá, xeneró dellos alderiques. Nun entamu aldericóse sobre’l nivel de polítización de les movilizaciones estudiantiles. Fano espuso que la fuercia del movimientu se basa, ente otros factores, na so independencia al respective de los distintos partíos políticos al mesmo tiempu que nun arrenuncia a tener una perspeutiva crítica sobre’l entornu social, yá que la Educación y la Universidá nun pueden ser entendíes al marxe de la sociedá.

Otru alderique que se desendolcó foi sobre’l sistema educativu en xeneral, el so progresivu deterioru dende la enseñanza primaria, y la so escasa conexón cola realidá asturiana (por exemplu, el deficitariu enseñu de la xeografía del País).

D’últimes, aldericóse tamién sobre l’Estáu del Bienestar, los sos distintos modelos (l’asistencialista de Gran Bretaña y el socialdemócrata/universalista de los países nórdicos) y la so actual situación de crisis por mor de la ofensiva neolliberal, de la desestructuración política de la clase obrera y d’una determinada xestión de lo “público” en clave caciquil y demagóxica.

Al fin, concluyo la Tertulia recordándose que’l derechu a la educación ye un derechu humanu fundamental que debe tar garantizáu polos poderes públicos.