Portada Lliteratura La RAE “llamenta’l dañu” que fixo a Pardo Bazán

La RAE “llamenta’l dañu” que fixo a Pardo Bazán

by redacción asturnews

La Real Academia Española (RAE) llamentó recién el “dañu” que fixo nel so día a la escritora, periodista y feminista Emilia Pardo Bazán al nun dexa-y ser académica pol fechu de ser muyer, nun actu d’homenaxe celebráu nesta institución na que la sentaron” na so inesistente siella 47.

Un día dempués de cumplise’l centenariu de la so muerte, el director de la RAE, Santiago Muñoz Machado, reconoció que Pardo Bazán (La Coruña, 1851- Madrid, 1921) “espereció” pol refugu de la Real Academia ya indicó que, anque nun se puede “enmendar la hestoria”, la escritora tendría de sentase na so simbólica siella 47 (solo hai 46 académicos de númberu).

Muñoz Machado lleó nel actu una carta que Pardo Bazán dirixió a la RAE en marzu 1914, escrita de la so mano, solicitando’l so ingresu na mesma, una misiva na qu’esplicaba los sos méritos lliterarios ya institucionales, los llibros que publicara y los cargos qu’ocupara.

Una forma “insólita”, una y bones los estatutos esixen que roblen la propuesta d’ingresu trés académicos de númberu, anque nun foi una “estravagancia” porque nel sieglu XIX dexábense tamién los pidimientos individuales, recordó’l director de la RAE. Como contestación a la carta, esiste un documentu que nun ta robláu, dixo Muñoz-Machado, nel que se señalaba que nun se diba a tramitar el pidimientu porque nun axuntaba les condiciones oxetives, esto ye, que nun yera un home.

Tres la muerte de Pardo Bazán, la marquesa de San Luis pidió en 1921 a la RAE que la designara académica honoraria pa reparar el dañu que se-y fixo, pero l’Academia de la Lengua nun envaloró’l pidimientu, anque’l so entós presidente, Antonio Maura, esplicó que nun fuera almitida a trámite por razones d’orde oxetivu.

Enantes a Pardo Bazán, nel sieglu XIX refugóse tamién la entrada na RAE por ser muyer a la escritora hispanu-cubana Gertrudis Gómez d’Ablanéu. Y hubo qu’esperar al añu 1977 por qu’entrara como primer académica Carmen Conde.

La vicepresidenta primera del Gobiernu y ministra de la Presidencia, Relaciones coles Cortes y Memoria Democrática, Carmen Calvo, estimó a la Real Academia l’actu d’homenaxe y al so director les sos “sinceres y valeroses palabres” reconociendo’l dañu que la institución fixo a Pardo Bazán.

 

Tamién te podria gustar