La Procuradora Xeneral d’Asturies edita una “Guía de los derechos de los usuarios de les Teunoloxíes de la Información (TIC) y la Comunicación”

La Procuradora Xeneral d’Asturies vieno acabante d’editar la primer ‘Guía de los derchos de los usuarios de les Teunoloxíes de la Información (TIC) y la Comunicación’ que recueye información abonda sobre los derechos del usuariu de les TIC nel ámbitu domésticu, cultural, comercial o docente, y una rellación de les principales normes que rixen la actividá nesti ámbitu. La Guía ta editada n’Asturies como resultáu d’un conveniu col Defensor del Pueblu andaluz.

La procuradora xeneral, María Antonia Fernández Felgueroso, va presentar esti miércoles la publicación xuntal Defensor del Pueblu Andaluz, José Chamizo de la Rubia, a les 12.00 hores na sede de la institución asturiana, na Cai Cabo Noval, 9 d’Uviéu.

A esta guía “práutica y de fácil consulta”, cola que la Procuradora quier afitar n’Asturies la promoción y espardimientu de los derechos de la ciudadanía, va siguir una segunda dedicada a los Derechos sobre Proteiciónn de Datos Personales.

La guía ta basada nel manual publicáu pol Defensor del Pueblu Andaluz, que cedió a la so homóloga asturiana los derechos d’utilización del mesmu. Pa ello, el testu orixinal adautóse a la realidá asturiana.

Les TIC y los derechos del ciudadanu van ser, precisamente, l’exe central de les XXIV Xornaes de Coordinación de Defensores del Pueblu, que va coordinar el defensor andaluz.