La gastronomía asturiana percorre les cais de Londres

La Selmana de la Cultura Española ‘A taste of Spain’ dedicó estos díes una xornada a la promoción de los atractivos turísticos y la gastronomía asturiana. Estes xornaes desendolcáronse en delles de les cais más importantes de la capital británica ente’l 31 de mayu y ayeri, 3 de xunu.

La Oficina Española de Turismu en Londres, en collaboración col Gobiernu d’Asturies y dientro del marcu del plan d’actuaciones de Turespaña, organizó estes xornaes de difusión turística onde milenta londinenses y demás visitantes de toes partes del mundu, pudieron conocer un pocoñín más sobre’l nuesu destín, y sobre too, tuvieron la oportunidá de saborguiar la nuesa rica ufierta culinaria.

Per una parte, tuvo l’acción de cai en ‘Regent Street‘, una de les más concurríes y céntriques de la ciudá, onde Asturies, nel marcu del Conveniu de la España Verde, promocionó la so artesanía, el so folclor y ufiertó información xeneral sobre’l nuesu destín.

Otra actuación importante foi la presencia en ‘Borough Market’, el 2 y 3 de xunu, el mercáu más bulliciegu de la ciudá, famosu porque se consolidó como’l principal centru del Reinu Xuníu, gracies a la calidá y variedá de los sos productos. L’oxetivu de la participación nesti eventu foi dar a conocer la gastronomía d’Asturies al traviés de prebes y oportunidaes de compra.

Como novedá esti añu, organizóse la primer edición de les Xornaes de Trabayu “A Taste of Spain Travel”, un alcuentru comercial directu, col sector turísticu británicu. Esta cita profesional celebróse nel recintu ‘Vinopolis”, coincidiendo cola celebración de Borough Market.