La gastronomía asturiana llega a Bruseles de la mano de cinco restauradores de prestixu

La capital de la Europa Comunitaria va acoyer los díes 23 y 24 de xunu les primeres xornaes gastronómiques asturianes, nes que cinco representantes de la cocina rexonal van ofrecer creaciones culinaries “con tol sabor” del Principáu. Los restauradores que participarán na iniciativa son ‘chefs’ de reconocíu prestixu: Javier Loya del Río, propietariu y xefe de cocina de ‘Balneario de Salinas’; Koldo Miranda, del mesmu restorán; Julio Blanco, dueñu del salón d’alta pastelería ‘Pomme Sucre’; Rodrigo Roza, de ‘La Taberna del Zurdo’, y Marcos Morán, representante de la quinta xeneración del restorán ‘Casa Gerardo’.

El menú, qu’inclúi platos d’innovación, tradicionales, postres, tapes y vinos, va ufiertase les nueches del día 23 y 24 de xunu nel restorán ‘Les Asturiennes’, metanes del corazón de Bruseles.

Amás, na mañana del 24 va tener llugar un cursu de cocina –ente les 9 y les 11, hora local– nel edificiu del Principáu d’Asturies na capital belga. Nel, los cocineros van revelar secretos de dalgunos de los sos “platos insignia”, sigún indican los organizadores.

Ente otros platos, los asistentes van poder saborguiar arbeyos con xamón, niguiri de caballa o gochu confitáu, productos que sedrán llevaos expresamente a Bruseles pa la ocasión.