La Feria LibrOviedo acueye la presentación del nuevu númberu de Lliteratura

La Feria LibrOviedo acoyía na tarde d’esti llunes la presentación del nuevu númberu de Lliteratura, que ficiera la so direutora Marta Mori y que cuntó cola presencia de dellos autores qu’espublicen los sos trabayos nesta nueva entrega.

Esti llunes 7 de mayu, a les 19,45 hores tuvo llugar en LibrOviedo la presentación del númberu d’esti añu de la revista Lliteratura nun actu nel que participaron poetes qu’escriben nel mesmu como Aida Escudero, Pablo X. Suárez, Lucía Fernández Marques y Miguel Rodríguez Monteavaro.

La Feria, qu’entamó esti 4 de mayu y va desenvolvese hasta’l 13, celebra so 25 Aniversariu ya incluyi decenes d’actividaes amás de la vienta y la firma de llibros, como representaciones teatrales, cuentacuentos o cine. “Oxalá esta cita perdure por enforma tiempu porque tamién se llee col tactu y el sentimientu”, deseyó Wenceslao López, mientres la inauguración. La Corporación municipal, encabezada pol alcalde, Wenceslao López, inauguró la selmana pasada LibrOviedo, na plaza de Trascorrales, con un total de 15 llibreríes de la capital ufiertando alredor de 10.000 volumes, toos con un 10% de descuentu.

La ufierta lliteraria completase con teatru, talleres, recitales o cine y la organización espera llegar a los 70.000 visitantes. Na inauguración l’Alcalde sorrayó tamién el papel de la Lliteratura, la importancia de los llibros y felicitó a los llibreros pol 25 aniversariu de la Feria, que nesta edición va combinar más que nunca la Lliteratura col teatru o’l cine.

Tol programa equí: https://tinyurl.com/y968qxzw