La Factoría Cultural d’Avilés ufierta cursos gratuitos de distintes técniques artesanales

La Factoría Cultural abrió’l periodu d’inscripción en dos nuevos cursos gratuitos que funden distintes técniques artesanales. So la denominación de “Fusión 1.0: Artesanía tradicional y contemporaneo: cestería, cerámica y grabáu”, y “Fusión 2.0: Cerámica y xoyería: artesanía y diseñu”, tán empobinaos prioritariamente a muyeres mayores de 18 años, residentes nel ámbitu rural y nos barrios periféricos d’Avilés.

Cada unu de los dos cursos cunta con una llende de 15 participantes. Si esistieren places vacantes va almitise la solicitú de toes aquelles persones que nun cumplan los requisitos fitos na convocatoria, como homes o nuevos d’ente 16 y 18 años. Pa inscribise nestos talleres nun ye necesariu cuntar con conocencies previes.

El plazu d’inscripción yá ta abiertu en dambos casos y va cerrase el vienres 19 de payares. Les solicitúes pueden tramitase al traviés del númberu de teléfonu 985 548 617; presencialmente, nes instalaciones de la Factoría Cultural d’Avilés (Avenida de Portugal nº 13); o por aciu corréu electrónicu a la dirección ssanchezpaviles.es, facilitando nome y apellíos, localidá de residencia, númberu de teléfonu y númberu del documentu nacional d’identidá.

La Factoría Cultural entama estos nuevos cursos en collaboración cola Federación Española d’Universidaes Populares, al traviés del proyectu estatal IRPF: 2020.

Fusión 1.0: Artesanía tradicional y contemporaneo: cestería, cerámica y grabáu

L’oxetivu prioritariu d’esti taller ye la recuperación de distintes técniques artesanales y la busca de nuevos productos ensertaos na tradición, pero con conceutos y usos innovadores y actuales.

Va Cuntar con 150 hores lectives y va desenvolvese dende’l 22 de payares hasta’l 31 de marzu de 2022, los llunes y miércoles n’horariu de 16:30 a 20:30 hores, y los xueves de 18:30 a 20:30 hores.

Fusión 2.0: Cerámica y xoyería: artesanía y diseñu

Esti taller va centrar na recuperación de distintes técniques artesanales y na busca de nuevos productos ensertaos na tradición, pero con conceutos y usos innovadores y actuales, incorporando la cerámica decorada al diseñu de xoyes.

Va Cuntar con 120 hores lectives, que se van desenvolver dende’l 23 de payares hasta’l 11 de marzu de 2022, los martes y vienres n’horariu de 16:30 a 20:30 hores, y los xueves de 16:30 a 18:30 hores.

Más información