La discriminación llingüística sigue perende

Dende la Cooperativa El Nocéu denuncien esti día  la situación de discriminación llingüística que sufren énte la Tesorería Xeneral de la Seguridá Social al nun ser almitíos los so estatutos por tar redactaos n’asturianu, siendo obligaos a presentalos en castellanu.

Discriminando otra vuelta a cuantos ponen en práutica la Llei vixente nel Principáu d’Asturies, l’Alministración del Estáu ufierta otra vuelta la evidencia de que namái cola oficialidá se respeten derechos fundamentales de los asturianos, sigún denuncia esta Cooperativa.

Nuna nota de prensa asoleyada esti vienres, la cooperativa desplica qu’al intentar dase d’alta como trabayadores de la cooperativa, “atopámonos cola imposibilidá de facer cualesquier xestión cola almistración estatal na nuestra llingua propia, empleando na so argumentación l’artículu 4 del capítulu II de la Llei d’Usu y Promoción del Asturianu nel que se llimita l’usu d’esti idioma a l’alministración autonómica. Nuna segunda instancia, na qu’una trabayadora d’esti organismu debía recurrir a los estatutos pa resolver una cuestión llaboral, ésta nun quixo nin garralos pol fechu de tar escritos n’asturianu”.

Ye por esto que demanden que se revierta esta situación de discriminación continua: “Les persones qu’optamos por usar el nuestru idioma a la hora d’espresanos, de forma oral o escrita, nun podemos siguir marxinaes d’esta forma tan inxusta. Queremos dexar de ser persones de segunda a los güeyos de los poderes que siguen reprimiéndonos una y otra vez, cuando lo únicu que pidimos ye que se respeten los nuestros derechos básicos, la llibertá de poder espresanos na nuestra llingua. Asina ye que l’únicu marcu que puede garantizar los derechos llingüísticos básicos de les persones asturfalantes ye la oficialidá del asturianu“.