“La Corexa” desenrrolla güei na Arribada una amuesa d’indumentaria tradicional asturiana

L’asociacion La Corexa va facer una esposición d’indumentaria tradicional asturiana nesta edición de l’Arribada. A mou desfile, los participantes van dir vistiéndose al empar que s’espliquen les pieces de la ropa d’entós, tanto del home como de la muyer. L’actu va celebrase güei 17:30 hores.

Dicía Xovellanos que “hai munches persones que son foriates na so propia tierra, porque enxamás s’esmolecieron por conocela”. Anguaño, cola universalización d’ elementos culturales de cualesquier orixe, el problema de la perda d’identidá ye enforma más grave. Acabante d’entamar el sieglu XXI, atópase n’Asturies un fondu desconocimientu del país, de la so historia, de les sos tradiciones y patrimoniu, al empar que l’incontenible poder mediáticu, siempre alloñáu de los intereses asturianos, algama unos niveles de penetración social enxamás vistos, que desanicien pasín a pasu la identidá y les tradiciones de nuestro.

Con munchu menor puxu, atópase tamién que la conciencia de pueblu xorrez y los asturianos participen activamente en milenta opciones socio-culturales propiciaes pola sociedá civil. Nesti contestu d’urxencia por trabayar en favor de la nuesa cultura ñació La Corexa. Col enfotu d’investigar y dar puxu a una parte del patrimoniu asturianu que nun tuviere atendida, hasta güei, como oxetu específicu d’esi llabor n’Asturies: el traxe históricu asturianu, aquelles últimes modes coles qu’asturianes y asturianos fuimos reconocíos como talos dientro y fuera’l país.

Na introducción de la so páxina web La Corexa cuenta lo que sigue: Cunta la lleenda que’l fiyu d’un xuez sacerdote xudío, tuvo’l determín de salir a conocer mundu. Nel so viaxe aportó al reinu d’Exiptu. Ablucáu pol calter de la vida ellí, bien llueu escaeció los sos raigaños y acoyó los vezos y el vistir del nuevu país. Una nueche dempués de dellos años suañó que, nel so llar, so pá -que naguaba por velu- texía coles sos propies manes un mantu de llana perricu. El mozu, al vistir ropaxe talo, sintió atopar la so braera identidá, vistiéndose del so propiu yo mentantu la bona prenda lu cubría. Al esconsoñar recoyó lo de so y escomencipió’l camín pa tornar a casa de so pá. Al fin comprendía quien yera. Del mesmu mou, los asturianos fuimos escaeciendo nel camín la industrialización y la imposición política y cultural, abondos rasgos de la nuesa tradición. Por mor de camudamientos innecesarios, estereotipos y estandarizaciones, ayeno too al saber popular, la indumentaria tradicional asturiana quedó amenorgada y tornóse una caricatura burllona de lo que fora n’ otres dómines, desaniciándose na alcordanza de los asturianos, tanto que namái dellos reconócenla güei como de so. Gracies a trabayos d’estudiosos como Lluis Argüelles y a los enfotos de coleutivos d’investigación que trabayaron a lo llargo los años 80 y 90 del sieglu XX, agora, nel entamu una nueva centuria, podemos ufiertar a los asturianos lo que foi la moda nel vistir a lo llargo de más de 150 años na historia de nueso, garrando puxu, pa güei y pal futuru, aquella seña d’identidá al emplegar otra vegada les prendes y los traxes carauterísticos de la nuesa tradición.

Indumentaria tradicional asturiana ye, entós, la bayura traxes y prendes que’a lo llargo un sieglu (dende 1800 a 1920) vistieron los nuesos antepasaos. Correspuende a un momentu modal común a toa Europa, que camuda y desendólcase nesa dómina meciéndose, al empar, con elementos propios del país y vezos d’estremaos oficios. Les modes quedaron marcaes polos camudamientos sociales de tou esi tiempu.