La Coordinadora Ecoloxista denuncia que tan convirtiendo los ríos asturianos,en canales d’evacuación de les agües

La Coordinadora Ecoloxista d´Asturies presentó denuncies ante la Conseyería de Agroganadería y Recursos Autóctonos del Principáu poles actuaciones de dragáu del calce del ríu Nalón que la Confederación Hidrográfica del Cantábricu ta realizando nesa cuenca nes vegues de Luerces y Repollés en Pravia y al tiempu denuncia que tan convirtiendo los ríos asturianos, en canales d’evacuación de les agües.

Esti organismu publico ta realizando unos desproporcionaos dragaos, costume que equivocadamente creíamos erradicada, daos los evidentes daños y estroces medioambientales qu’eso supon y los nulos beneficios de control d’aveníes a mediu y llargu plazu que xeneren estes acciones, en vista d’esperiencies similares n’otros llugares d’Asturies.

Amás de los dragaos del calce, ta esaniciándose el monte de ribera. La vexetación de ribera ye d’importancia vital pa la supervivencia de numberoses especies d’aves, mamíferos y anfibios, munchos d’estos puramente protexíos dada la so catalogación a nivel rexonal y nacional. Destacamos a la llondra o a la xaronca común, como exemplos más significativos y claros que’l so hábitat tán siendo estrozaos nestos momentos por estes actuaciones.

Sigún la Coordinadora, esulta cuandoquier chocante qu’estes obres tean siendo realizaes por un organismu que forma parte del Ministeriu a Agricultura, Alimentación y Mediu Ambiente y que por tantu debería de velar pola protección del ecosistema fluvial y nun realizar obres que paecen empuestes .

La Confederación Hidrográfica ta convirtiendo los ríos asturianos, en canales d’evacuación de les agües, cola perdida continua de naturalidá que se ta consiguiendo con estes esbarriaes obres.

La Coordinadora quier recordar que’l Nalón “pol fechu de caltener entá nes sos agües poblaciones de salmón atlánticu, tien la clasificación como Llugar d’Importancia Comuñal (LIC), lo cual implica que cualquier obra en dichos llugares precisen de la previa aprobación d’una Evaluación Preliminar d’Impactu Ambiental, (EPIA), de la cual nun tenemos constancia”. Per otru llau dichu ríu ta incluyíu dientro de la rede Natura 2000, lo cual fai necesariu’l trámite d’un Estudiu d’Impactu Ambiental, trámite muncho más complexu y restrictivu del que nun hai constancia de la so realización.