La Comisión de Presupuestos del Parlamentu Europeu visita Asturies

Los ocho miembros de la Comisión de Presupuestos del Parlamentu Europeu van tar estos díes de visita per Aviles, Xixón, Uvieu, Llanera y Llangreu-La Felguera, por unes xornaes coordinaes pola Dirección Xeneral de Rellaciones Esteriores y Asuntos Europeos qu’escomenzarán güei cola visita a la Ría d’Aviles y al Puertu de Xixón. L’obxetivu d’estes xornaes ye amosa-yos a los Comisarios dalgunes de les midides y de los proyectos más representativos que foron desendolcaos n’Asturies nos ultimos años gracies a la xestión de los Fondos Estructurales y el Fondu de Cohesión; principales instrumentos financieros puestos a disposición pola Unión Europea, col obxetivu de fortalecer la cohesión económica y social.

El primer actu del día tendrá llugar güei a les 17:30 n’Aviles onde l’alcalde de la villa Santiago Rodríguez Vega, va recibir a los comisarios pa conocer in situ les meyores feches na rodiada de la ría. Ente los actos programaos ta la visita a la depuradora de Maqua, ún de los pilares del saneamientu integral de la Ría d’Aviles y al puntu d’encuentru: ‘Punte de aprendices’, onde se-yos va esplicar con paneles les obres feches.

La xornada terminará a les 19:30 nel Puertu de Xixón onde los miembros de la Comisión van tener la ocasión de siguir los avances nel proyectu d’infraestructures y tresporte de l’Autoridá Portuaria de Xixón pal puertu d’El Musel.

Mañana, la delegación va treslladase a Uvieu pa visitar el Consorciu de Xestión de Residuos (COGERSA) y p’asistir a la reunión posterior na se de Presidencia d’Uvieu col Presidente del Principáu d’Asturies, Vicente Álvarez Areces, el Conseyeru de Xusticia Seguridá Pública y Rellaciones Esteriores, Francisco Javier García Valledor, y el Conseyeru de Facienda,Jaime Rabanal García.

La Comisión terminará la so estancia nel Principáu col actu programáu en La Felguera pa conocer la Ciudá Industrial y Tecnolóxica del Valle’l Nalón (VALNALÓN) y el so proyectu de formación, emplegu y nueves tecnoloxíes.