La Caixa patrocina’l Diccionariu dixital de la RAE con un millón al añu

La 23ª versión del Diccionariu de la Real Academia Española, que ta disponible en formatu impresu dende la seronda de 2014, puede dende güei consultase en llínea.

La nueva versión del diccionariu de la RAE estrena ovedaes como meyores opciones de busca y un patrocinador, La Caixa, que va apurrir alredor d’un millón d’euros al añu, la cantidá qu’embaraxara l’Academia pa caltener la naturaleza abierto y gratuito de la so principal obra de referencia n’Internet, de la que palía en parte’l so desaxuste económicu de 2,5 millones d’euros. “Yera fundamental llegar a un alcuerdu porque esto fai posible tener un ingresu por daqué que l’Academia va siguir ufiertando de forma gratuita”, comentó’l director de la RAE, Darío Villanueva.

La nueva cara del Diccionariu yá puede vese na web, con más interactividá pa los usuarios y más opciones de busca. “Pueden consultase palabres, lemas, desinencies, o pues unviar la palabra per corréu eléctronicu”, esplicó Villanueva esti día. Y, al respective de la versión impresa, incorpora otra novedá mas, que ye l’alvertencia del usu ofensivu o discriminatoriu de delles acepciones, como ye’l casu de “xitanu”.

Esta edición, qu’anueva la de 2001, contien 93.111 artículos y 195.439 acepciones y va ser la última preparada pal formatu en papel, porque les siguientes ya van nacer con vocación dixital.