L.lena coloca 13 nuevos cartelos cola toponimia tradicional nos pueblos del conceyu

El Conceyu de L.lena tien previsto colocar a lo llargo d’esti mes y del mes xineru los cartelos d’una nueva fase de la campaña de recuperación de la toponimia llocal. Estos indicadores, que se van colocar nes carreteres que dependen del Conceyu, formen parte d’un programa del Serviciu de Normalización Llingüística de L.lena pa dotar al conceyu d’una señalización basada nos nomes tradicionales que yá s’oficializaron pol Conseyu de Gobiernu del Principáu d’Asturies en xuentu del 2005.

Nesta fase van colocase un total de 13 carteles en: Congostinas, Sorribas, Otero, Mamorana, Muñón Cimiru, La Maramuniz, El Trechuru, Brañal.lamosa, El Quempu, El Brañil.lín, La Muela, La Ilesia y un cartel señalizando’l desvíu pa Ronzón y la Ilesia de Castiel.lo.

El coste d’estos cartelos y la instalación asciende a 1.500 euros, subvencionáu pola Conseyería de Cultura al traviés de la convocatoria de subvenciones destinaes a Corporaciones Llocales pa la normalización social de la llingua asturiana.

La primer fase d’esta campaña fízose finales de 2004, empezando naquel momentu polos núcleos que nun teníen indicadores. La intención de la Corporación Llocal ye la de seguir rotulando les carreteres de L.lena , anque de momentu namás se pue actuar nes carreteres de titularidá del Conceyu. Tán faciéndose trámites cola fin de que se concedan los permisos pa cambiar les señales de la carretera N-630 y les de competencia del Principáu pero hasta agora la respuesta foi negativa aludiendo a la non titularidá de les mesmes por parte del Conceyu.

Entamu del procesu en 2004