L’Ayuntamientu de Xixón edita dos xuegos de mesa fechos polos escolinos del conceyu

La Oficina Municipal de la Llingua de Xixón editó dos xuegos de mesa fechos polos alumnos d’Educación Secundaria de los institutos Emilio Alarcos y Doña Jimena, que fueron los ganadores de la primer edición del concursu “Vas velo,trebeyos pal aula”. El certame tuvo como premiu la edición de 300 exemplares de caún de los xuegos que serán repartíos ente los escolinos xixoneses asina como un intercambíu cultural col conceyu portugués de Miranda del Douro.

Los escolinos/es del Doña Jimena algamaron el premiu col xuegu “De coríu a coríu”, un pasatiempu inspiráu nel “xuegu de la oca” , que tien un lléxicu rellacionáu cola casería asturiana. Per otru llau, los escolinos y escolines del institutu Emilio Alarcos presentaron “El xuegu de la Llingua”, una variedá del xuegu “Tabú”.

“El xuegu de la Llingua” va repartise ente escolinos y escolines de Secundaria y “De coríu a coríu” ente los de los caberos cursos de Primaria. El xuráu tuvo formáu por Carmen Rúa y María Xosé Rodríguez, presidenta y secretaria respeutivamente; y como vocales, el xefe del Departamentu de Programes Educativos de la Fundación Municipal de Cultura, Manuel González; el coordinador d’Enseñanza de la Llingua de la Conseyeria d’Edución; y el vicesecretariu y miembru de l’Academia de la Llingua, Urbano Rodríguez.