L’enseñu del mirandés va cuntar con un manual d’apoyu pedagóxicu per primer vegada

Cuasi una década dempués de la declaración d’oficialidá de la variante mirandesa del asturianu como la segunda llingua de Portugal, y más de venti años dempués d’entamase l’enseñu del idioma nes escueles de Miranda del Douro, los mirandeses cuenten per primer vegada con un manual pedagóxigu pa dar les clases.

Los cerca de 400 alumnos que deprenden mirandés nes escueles de Miranda del Duero van recibir de baldre’l llibru “Las mies purmeiras palabras an mirandês” . La iniciativa entámala’l “Centru d’Estudios Mirandeses” (CEM), que quier asina reforciar les clases de la llingua propia de la comarca portuguesa de fala asturiana.

Los autores del llibru son António Bárbolo y Duarte Martins, y la presentación foi ayeri, nel “Día Internacional de la Llingua Materna”. La UNESCO, pela so parte, unvió una felicitación por esta iniciativa.

L’enseñu del mirandés lleva faciéndose dende 1987 y como cuenten los propios responsables de la publicación “nun cuenta con un programa marcáu y los profesores nun tienen materiales afayadizos pal so trabayu”. Con esta nueva ferramienta l’enseñu del mirandés da un pasu más.