L’ALLA entama un Cursu d’Alfabetización d’Adultos en Llingua Asturiana nel Cabu Peñes

L’Academia de la Llingua Asturiana ta organizando pa los conceyos de Carreño y Gozón – xunto col Serviciu de Normalización Llingüística de la Mancomunidá d’El Cabu Peñes – un cursu d’alfabetización en llingua asturiana p’adultos.

Ye ésti un cursu d’aniciu que tien l’enfotu cimeru de facer llegar estos conceyos, al traviés de les sos asociaciones y pa toos aquellos interesaos, el deprendimientu básicu de la llingua. Con un llargor de 36 hores, l’horariu y repartu de les hores van concretase cola xente interesao, quedando pa ello unos díes enantes del mesmu y intentando igualu de la manera más afayadiza pa tola xente, según espliquen los organizadores.

En sabiendo la xente apuntao al cursu – pa lo que se necesita un mínimu de 10 persones per caún – ésti entamaría darréu, nos siguientes 15 díes más o menos.

Ye ésti un cursu de baldre pal que namás va necesitase contar col manual col que se va trabayar – “Xeitu” ye’l primer manual de llingua asturiana empobináu dafechu pa l’alfabetización d’adultos. Recueye non solo gramática y exercicios sobre la llingua, sinón tamién testos d’estremáu calter (lliterarios, rellacionaos cola llingua na cai, cola cultura tradicional…) que s’axusten a les demandes del alumnáu de los cursos d’asturianu p’adultos -.

Amás l’Academia entregará a cada alumnu/a un exemplar de les “Normes Ortográfiques” y otru de la “Gramática de la Llingua Asturiana”.

De contar cola xente necesario van facese dos cursos: ún pa cada conceyu; en casu nun algamar el númberu aparente pa cada cursu organizaráse unu pa los dos conceyos. La fecha p’apuntase ye hasta’l martes 21 d’abril 2009. En terminando, cada alumnu recibirá un certificáu d’asistencia.

Pa más información ponese en contactu col Serviciu de Normalización Llingüística de la Mancomunidá d’El Cabu Peñes nos tfnos: 985883532 y 985872406. Tamién al corréu: llingua@mcabop.com