L’Academia presenta “Xeitu”, un nuevu manual pal deprendimientu de la llingua asturiana

Güei xueves, a les 12’30 hores l’Academia de la Llingua Asturiana presentará en Llangréu, na Casa la Cultura de Sama asitiada na cai Dorado 6, el llibru Xeitu. Manual pal deprendimientu de la llingua asturiana, editáu pola propia institución faciendo’l númberu 2 de la coleición «Erbíes». Nel actu intervendrán la Conceyala de Cultura, Turismu y Política Llingüística del Ayuntamientu de Llangréu, Ana Oliva Rodríguez García, la Presidenta de l’Academia de la Llingua Asturiana, Ana Mª Cano González y el Responsable de Formación de de l’Academia de la Llingua Asturiana, Xosé Antón González Riaño.

Xeitu ye’l primer manual de llingua asturiana empobináu dafechu pa l’alfabetización d’adultos. Recueye non sólo gramática y exercicios sobre la llingua, sinón tamién testos d’estremáu calter (lliterarios, rellacionaos cola llingua na cai, cola cultura tradicional…) que s’axusten a les demandes del alumnáu de los cursos d’asturianu p’adultos.

La presentación, informa l’Academia, quier facese en Llangréu “como reconocencia a los altos niveles d’usu y escolarización que la llingua asturiana siempre tuvo nesti conceyu”.