José Cardín liderará la denominación d’orixen de la sidra ensin l’apoyu esplícitu de los collecheros

José Cardín liderará la xestión de la denominación d’orixen de la sidra nos prósimos cuatro años. El xerente de la empresa El Gaitero convirtióse ayeri nel primer presidente del Conseyu Regulador de la sidra elixíu por votación, col sofitu de los seis vocales correspondientes a los llagareros -ente los que ta él mesmu- pero cola abstención de los seis representantes de los collecheros, qu’asumirán la vicepresidencia.

Nuna votación abierta a los doce miembros del Conseyu Regulador, que quedó constituyíu ayeri depués de les elecciones cellebraes el pasáu 24 de xunu, Cardín ‘collechó’ la rocea de los productores de mazana, qu’evitaron apoyar de mou esplícitu la so candidatura pero nun votaron en contra, aparcando asina l’enfrentamientu ente llagareros y atropadores que marcó’l primer procesu ellectoral internu del Conseyu.

Hasta agora, esi organismu taba presidíu por Ignacio Fuejo, nomáu pol Principáu pa dirixir los primeros pasos de la denominación d’orixen antes de la so aprobación efectiva por parte de les autoridaes europees, y qu’ayeri coló del cargu ente dalgunes crítiques al so llabor pola so condición d’ayenu a los sectores de collecheros y ellaboradores.

La etapa qu’agora abre el so sucesor quier afitar, según avanzó’l propiu Cardín, la comercialización internacional de la sidra acoyida a la denominación d’orixen, y pa ello, destacó’l nuevu presidente’l Conseyu Regulador, ye preciso que’l Gobiernu autonómicu demuestre que cree na marca de calidá de la sidra más allá “de lo folclórico” y refuercie’l so apoyu económicu.

Ente les amplies competencies que-y correspuenden por llei al Conseyu Regulador de la Sidra figuren el control de la calidá de la mazana nes pumaraes, el siguimientu de cada pasu de la ellaboración y la promoción publicitaria de la denominación d’orixen.

Nes elecciones del pasáu día de San Xuan, José Cardín algamó 19 votos d’un censu de 38 llagareros y sobro un total de 24 votos emitíos. Xunta él, representen a los ellaboradores nel Conseyu Regulador Herminio Alonso, Consuelo Busto, Eloy Cortina, Víctor Manuel Escalada y Francisco Martínez. Son vocales de los collecheros José Luis Rubiera, Álvaro Menéndez, Pablo Echanobe, José Madiedo, Antonio Muñoz y José María Díaz.

Web oficial del Conseyu Regulador de la Sidra