José Ángel Gayol faise col Xuan María Acebal de poesía

L’escritor José Ángel Gayol ye’l ganador de la decimoctava edición del Premiu de poesía en llingua asturiana Xuan María Acebal, que concede añalmente’l Gobiernu d’Asturies. El xuráu tuvo formáu polos escritores Xosé Anxelu Gutiérrez Morán, Pablo Texón y Lourdes Álvarez, baxo la presidencia de la directora xeneral de Política Llingüística, Ana María Fueyo, y alcordó’l premiu por unanimidá. El gallardón ta dotáu con 4.000 euros, dempués de la baxa dende los 7.000 euros que llegare a algamar n’ediciones pasaes.

El testu premiáu lleva por títulu ‘El llibru de les coses misterioses’ y foi presentáu embaxo’l nomatu Tenysson. El xuráu destacó que ye un poemariu que, “basándose na memoria y el viaxe, apurre l’ecu personal de les voces ayenes”.

José Ángel Gayol (Mieres del Camín, 1977) ye escritor y críticu lliterariu, collaboró con revistes lliteraries como Clarín, Reloj de Arena, Paralelo Sur, Formientu, esTandoriu y medios de comunicación como La Nueva España.

Realizó la edición ya introducción del volume colectivo “Nuevas maneras de contar un cuento” (Llibros del Pexe, Xixón, 2005) y col llibru Con el velo de una sonrrisa (Ed. Nobel, Uviéu, 2006) ganó’l Premiu Asturies Mozu de Poesía 2005.

En llingua asturiana publicó la novela Argonautes (Ámbitu, Uviéu, 2007), la obra de teatru Ensin noticies del fin del mundu (Universos, Mieres del Camín, 2011) ganadora del Premiu Asturies Mozu de Testos Teatrales 2010, amás d’artículos y cuentos en prensa y antoloxíes. Tien dos poemarios en víes de publicación: Los poemes del oriental (XX Premiu Elvira Castañón, 2011) y Los suaños y los díes (XVIII Premiu Fernán Coronas, 2011).

Ye llicenciáu en Derechu pola Universidá d’Uviéu, llicenciáu n’Antropoloxía Social y Cultural pola UNED y Máster n’Hestoria y Analís Sociocultural pola Universidá d’Uviéu.