Portada Uncategorized IX va faer un llamamientu pa establecer un ‘itinerariu’ pola oficialidá

IX va faer un llamamientu pa establecer un ‘itinerariu’ pola oficialidá

by redacción asturnews

IX va faer un llamamientu a otru partíos pa establecer un ‘itinerariu’ pola oficialidá del asturianu y darréu d’ello va pidir la concreción d’una fueya de ruta que dexe algamar la reforma del Estatutu pa incluyir la oficialidá del asturianu.

Con esta fin, la Coordinadora de la formación aprobó esta selmana pasada y fizo público’l sábadu, en coordinación col movimientu asturianista, la realización d’un llamamientu a los partíos políticos pa empecipiar el procesu de cambéu lexislativu necesariu que dexe l’usu de la llingua n’igualdá de condiciones que’l castellán.

Pa IX, llegó’l momentu d’establecer un “itinerariu” pa la oficialidá que, amás, va evitar que la estrema derecha pueda siguir utilizando l’asturianu como arma refundiza, conculcando el derechu de los asturianoparlantes y atacando un patrimoniu cultural como ye la llingua tradicional.

Al respective de la reforma l’Estatutu, IX d’Asturies, en coordinación col movimientu asturianista, va realizar un llamamientu a los partíos políticos pa establecer un itinerariu ciertu pa llograr la reforma estatutaria necesaria pa declarar l’asturianu “llingua oficial” cuanto antes.

La “oficialidá” va tener un efectu inmediatu: va evitar que la estrema derecha pueda siguir intentando confundir a la sociedá sobro un derechu democráticu y un patrimoniu cultural que va xenerar riqueza. Permanecer na inacción al respective de la “oficalidá” namái otorga oportunidá a los estremistes pa construyir mensaxes electoralistes.

Una iniciativa política axilosa y tresparente va alloñar a la nuesa llingua de los radicalismos que ven na división conflictiva una oportunidá pa les sos polítiques.

Tamién te podria gustar