Iris Díaz Trancho presentó’l llibru “La neña de les trences al revés”

L’escritor Vicente García Oliva y el responsable de la editorial Trabe, Antón García, presentaron xunto a l’autora, el llibru infantil “La neña de les trences al revés” esti vienres a les ocho la tarde nel Institutu Vieyu de Xixón.
El llibru, conformáu por un cuentu d’Iris Díaz y les ilustraciones de Sara Rosado, acerca a los llectores a una doble visión del mundiu, dende’l puntu de vista de dos de neñes, una europea y otra africana, que coneuten y son capaces d’intercambiase nel espaciu namás con camudar el sentíu de les trences.
L’autora dixo «nun tener intención moralizante al escribir el llibru» pero reconoció que les referencies a les desigualdaes ente les dos neñes apaecen nel llibru de contino «porque ye inevitable al escribir sobre personaxes que viven en países con tantes diferencies económiques y sociales».
La edición en tapa dura y a tou color ye de la Editorial Trabe y nun ye la primer obra de l’autora, que ye una de les voces que más suenen ente los autores más mozos de la lliteratura asturiana. Díaz Trancho (Xixón, 1981) tien espublizaos testos en Lletres Asturianes, Formientu y otres revistes. Ganó’l concursu de lliteratura infantil de l’Academia de la Llingua Asturiana y el prestixosu Concursu de Cuentos Curtios d’El Garrapiellu ente otros.

La neña de les trences al revés.