Iniciativa reclama una partida pala ALLA nos presupuestos del estáu

Iniciativa pol Asturianu reclama que l’Academia de la Llingua Asturiana cunte con una partida nos Presupuestos Xenerales del Estáu 2017, al tiempu que reivindica tamién que l’academia asturiana gocie n’igualdá de condiciones de les mesmes prestaciones qu’otres academies del Estáu.

Nuna nota de prensa asoleyada esti miércoles 12 d’abril, Iniciativa pol Asturianu facía alcordanza de que vien proponiendo dende 2013 a los grupos políticos con representación por Asturies nel Congresu “la presentación d’enmiedes a los Presupuestos Xenerales pa que l’Academia de la Llingua Asturiana cunte con una partida, como tienen la española, catalana, vasca y gallega, amás d’otres instituciones académiques presentes nuna partida dedicada a la so financiación”.

Esti añu, dicen, “volvimos a solicita-yos a los grupos nel Congresu la presentación d’una enmienda parcial a los Presupuestos Xenerales del Estáu que reclame una partida pa l’Academia de la Llingua Asturiana, qu’acabe con esti agraviu y lo que consideramos una inxusticia pa la llingua asturiana”.

Nesta ocasión, y col envís de da-y visiblidá al consensu al rodiu d’esti tema, “solicitamos a los diputaos que la enmieda seya conxunta ente tolos diputaos asturianos nel Congresu, esperando y volviendo a pidir al PP que se sume a esta moción y desbloquie esta partida pa l’ALLA, que nun ye más que la busca d’igualdá ente les academies que representen y curien les llingües del estáu”.

Nos Presupuestos de 2015 la Real Academia Española tuvo una partida de 1.661.290 €, l’Institut d’Estudis Catalans de 283.070 €, la Real Academia Galega de 283.070 € y l’Academia de la Lengua Vasca (Euskaltzaindia) de 153.180 €. Pel momentu hubo dellos movimientos nos partíos políticos: Foro Asturies confirmó que va facer una enmienda a la partida, asina como’l sofitu a esta reivindicación qu’amosaron públicamente les Mocedaes Socialistes.