Iniciativa pol Asturianu súmase a les campañes de los docentes d’asturianu

La Vocalía d’Enseñu d’Iniciativa pol Asturianu súmase a les movilizaciones organizaes polos docentes de llingua asturiana pa lluchar contra la desapaición de l’asignatura del sistema educativu. La cabezalera de la vocalía, María Díaz Suárez, participó na xunta de docentes organizada por SUATEA’l martes pasáu, onde se dedició poner en marcha delles acciones.

Iniciativa pol Asturianu anima a participar d’elles. La primera va facese’l 31 de xineru a les 17:30 nel Rexistru Xeneral del Gobiernu d’Asturies, dende’l que se mandarán cartes de los escolinos de toa Asturies a la conseyera amosando’l so esmolecimientu pola desapaición de la llingua asturiana na escuela y exerciendo’l so derechu a estudiala. Va a ser un actu reivindicativu con presencia de prensa nel que se pretende dexar clara la preocupación social pola desapaición de la llingua asturiana.

Per otru llau, afalen a la xente a participa de la campaña entamada na plataforma dixital Change, onde tan recoyéndose firmes que dirán dirixies a la Conseyera d’Educación y al Gobiernu d’Asturies pidiendo’l caltenimientu de la llingua asturiana dentro del sistema educativu. Hasta’l momentu son yá unes 2.000 les firmes consiguíes.

Firma pol futuru del asturianu nel enseñu