Iniciativa pide que l’alumnáu pueda esaminase na EBAU de Llingua Asturiana

Iniciativa pol Asturianu reivindica que l’alumnáu de Llingua Asturiana pueda esaminase de l’asignatura na EBAU. Nuna nota de prensa asoleyadsa esti día, Iniciativa reclama la posibilidá d’evaluar los conocimientos de la materia de Llingua Asturiana y Lliteratura nes pruebes al igual que se fai col restu de llingües d’España y les llingües estranxeres.

Iniciativa pol Asturianu reclama la valoración de los conocimientos d’asturianu dientro de les nueves convocatories de la Evaluación del Bachilleratu pal Accesu a la Universidá (EBAU) de manera voluntaria pa subir nota nel conxuntu de la prueba.

El colectivu considera qu’esta decisión consiguiría, por un llau, dar un mayor valor al aprendizaxe del idioma a lo llargo de tola etapa educativa y xeneraría un incrementu de la matriculación na materia de Llingua Asturiana y Lliteratura al percibir les families y el propiu alumnáu que los conocimientos algamaos tendríen una utilidá tanxible a curtiu plazu xenerando confianza ya interés. Resulta fundamental pal futuru de l’asignatura y del propiu idioma llograr esa valoración pa consiguir qu’esti trabayu de los y les docentes d’asturianu tenga esi reconocimientu académicu.

La organización de reivindicación llingüística considera tamién qu’esta disposición tien que dir de la mano cola propia valoración de les pruebes de certificación del B2 y C1 d’asturianu porque ye la manera de garantizar una normalización de la llingua al xunir el conceptu d’asturianu col conceptu de competencia llaboral.

Nesi sen, Iniciativa pol Asturianu recuerda que na actualidá’l restu de llingües d’España, a parte del castellán, si son reconocíes nestes pruebes d’evaluación pal acceso a la universidá lo que supón, una vegada más, una discriminación pa la llingua asturiana. Esta mesma reconocencia asocede tamién con llingües estranxeres como l’inglés y el francés o coles llingües clásiques.