Gotor fai anuncia de que sedrá candidatu a Rector en 2012

El rector de la Universidá d’Uviéu, Vicente Gotor, fizo anuncia esti miéroles por sorpresa, magar s’esperase dende hai tiempu, que tien “la intención” de presentase a les próximes elecciones al rectoráu de la institución académica, que se van celebrar en primavera. Fízolo nuna rueda de prensa na que diba falar de les matriculaciones d’esti añu na Universidá.

Nesta rueda de prensa, Gotor desplicó que’l camín entamáu pol so equipu nun puede finar nos ocho meses que-y queden de mandatu rectoral.

Gotor dixo que puede “facer más” na Alministración, que nes aules y que “va facer falta” contratar a más docentes na Universidá d’Uviéu, magar vayan tener que ser asociaos, una figura qu’a Gotor nun-y gusta, según dixo, pero que ye la única posible porque “hai árees que nun tienen nengún tipu de acreditación, nin contrataos-doctor, nin ayudantes-doctor”. Y desplicó, amás que l’asociáu puede dar 18 creitos, ente que la figura d’ayudante solo puede impartir seis.