Gotor fai anuncia d’austeridá y d’un nuevu reglamentu pa contratar profesoráu

El rector de la Universidá d’Uviéu, Vicente Gotor, aseguró na inauguración del nuevu cursu académicu que los obxetivos pal equipu rectoral pasen por “alministrar los fondos con tresparencia y austeridá, dando prioridá al gastu d’aquellos capítulos que calquen directamente nel llogru de los oxetivos fundamentales de la Universidá”. El desendolcu de nuevos reglamentos pa los concursos de places de profesoráu contratáu ye otra de les prioridaes del equipu de Gotor.

Vicente Gotor dixo tamién nel Paraninfu de la Universidá esti martes que’l Vicerrectoráu de Planificación Económica ta desendolcando un proyeutu pa meyorar dafechu la xestión, garantizando amás la tresparencia de la institución nel sen de rendir cuentes a la sociedá de tolo que faiga’l so equipu rectoral.

Asina, tres facer un repasu peles midíes que la institución va entamar a lo llargo del actual cursu académicu, el rector solicitó una “meyora de les dotaciones presupuestaries y reclamó una apuesta decidida” de la sociedá asturiana pola Universidá d’Uviéu. “La nuesa institución, integrada nel cambiu sustancial impuestu pol Espaciu Européu d’Educación Superior, va necesitar nueves aportaciones pa que les nueves idees. Va precisar poro l’esfuerzu conxuntu de toos, como la convicción de qu’esta reforma va permitir ofrecer graos postgraos, académicamente atractivos, apropiaos a les demandes del mercáu”, dixo Gotor. El rector tamién fizo especial mención al “dialogu lleal y tresparente”, que según él tuvo demientres estos meses col gobiernu rexonal y que “espera siguir calteniendo” pa poder facer frente a abondos retos. El primeru y más urxente d’estos retos pasa pela tresformación de dalgunes de les titulaciones nos nuevos Graos, nos que yá trabayen pa poder impartir dalgunos d’ellos nel cursu 2009-2010.