Fernández Mallo gana’l premiu Biblioteca Curtia con ‘Triloxía de la guerra’

L’escritor Agustín Fernández Mallo ganó esta selmana’l Premiu Biblioteca Curtia 2018, que convoca añalmente la editorial Seix Barral, cola novela “Triloxía de la guerra”.

Según el xuráu, la novela ganadora ye “una propuesta narrativa que tresforma la realidá del últimu sieglu n’una ficción apinada d’imaxes insólites, nes que se combinen poesía y ciencia, hestoria y política”. El xuráu del premiu taba integráu anguaño por Pere Gimferrer, Manuel Longares, Ricardo Menéndez Salmón, Edurne Portela y l’editora Elena Ramírez.

Con cinco años de trabayu nesta novela, Mallo dixo que la novela ye calidoscópica y que funciona en rede con munchu disparadores y enllaces a diversos llugares: “Non solo hai una rede, sinón qu’hai un calidoscopiu que lu xires y apaez otra imaxe”. Aseguró que nes sos páxines hai enllaces escontra’l sieglu XX y escontra l’antropoloxía, amás de muncha reflexón sobro qué son los vivos y qué son los muertos, yá que pa él “los muertos nunca tán muertos del tou, nin los vivos totalmente vivos”, sinón que dambos se comuniquen costantemente.

“La mayor rede social nun ye nenguna d’Internet, sinón la que xune a vivos y muertos”, amestó l’autor, que viaxó como convidáu a l’acutada isla de San Simón, y ellí sintióse devasáu pola so hestoria, y atopó que los sos referentes culturales nun dieren esplicación a lo que l’escritor taba esperimentando ellí. D’esa esperiencia empezó a escribir daqué y asitió a un personaxe viaxando solo a la isla y zarrándose ellí mientres un mes, xuna hestoria que dempués-y llevó a otros llugares: dende Normandía hasta Nueva York, pasando por tolos Estaos Xuníos, nuna reflexón sobro la contemporaneidad.

La primer parte del llibru titúlase La isla de San Simón (Combustibles fósiles)’, en relación a los muertos qu’inda son enerxía; la segunda lleva’l títulu d’un versu del cantar de David Bowie ‘Mikey Mouse creció y agora ye una vaca’ sobro la crecedera del imaxinariu norteamericanu escontra “lo semimonstruoso”, y la tercer parte llámase ‘Normandía (Los amos de la nueche)’, nun viaxe pola accidentada mariña normanda onde morrieron 100.000 homes.

Esta triloxía contien una reflexón sobro qué ye Europa y qué ye la Unión Europea: “Ye’l primer macroestáu formáu ensin violencia y colos mecanismos propios del postmodernismu: la publicidá y la seducción”, sintetizó. La so teoría parte de que quien conformen la Europa de güei nun vieron la muerte más que de raspión colos atentaos del 11-S y cola presencia de refuxaos sirios, “una y bones lo único que caltien espulsáda a la publicidá ye la muerte”.