Feliciten al Colexu Públicu de Motiana por usar la toponimia oficial y tradicional

El Colexu Públicu Montiana, de Xixón, ta acabante recibir l’aprobación de la Conseyería d’Educación pa que’l centru pase a denomase “Montiana”, nome tradiconal y dende va años oficial del llugar onde s’asitia, en llugar del deturpáu “Monteana”. Iniciativa pol Asturianu unvió una felicitación al centru aprovechando pa convidalos a siguir dando pasos na visibilidá del asturianu nel centru, talos como siguir faciendo medrar la matriculación na asignatura, usar l’asturianu na páxina web y na rotulación del centru, etc.

Esta decisión, que surdió del propiu centru, demuestra pa la organización que “l’alministración va mui per detrás de la ciudadanía nel usu de la toponimia tradicional y oficial d’Asturies”. Recuerden que yá va unos años, el CP de Xove, tamién en Xixón, camudaba la versión castellanizada “Jove” pola agora oficial y usada polos xixoneses dende siempres.