Entama la Folixa del Quesu y la Miel en Cangues

Esti xueves entamen los actos de la Folixa del Quesu y la Miel, en Cangues d’Onís, con una cata de quesos que se va desendolcar dende les seis y media la tarde nel Restaurante Casa Manuela de la villa canguesa.

Les actividaes, incluyíes na denomada Folixa del Quesu y de la Miel, van continuar nel vienres, día 5, na plaza del Ayuntamientu con un taller de cocina pa neños, que va tar al cargu de los cocineros del Restaurante Casa Manuela, La Cueva y Bodegón del Dobra. Darréu, el taller acoyerá la participación de los miembros de la asociación Emburria.

Esa mesma tarde, a partir de les ocho, y na Casa de Cultura, va desenrrollase l’actu de presentación de les Xornaes Gastronómiques del Quesu y de la Miel, asina como del Certame de Quesos. Y darréu va servise una degustación gastronómica pa los asistentes, con obsequiu del platu conmemorativu de la folixa del sábadu.

El sábadu dende les doce y hasta les dos de la tarde, va celebrase la parte central de la folixa: por un coste simbólicu de tres euros, que van ser donaos a la Asociación Emburria, los asistentes van tener derechu a dos degustaciones, sidra, un plato conmemorativu d’obsequiu, y a participar nes actividaes d’animación, qu’incluin música, talleres y una amuesa de fauna autóctona.

Amás, diez establecimientos hosteleros de Cangues d’Onís y Onís van participar nes Xornaes Gastronómiques del Quesu y la Miel, ufriendo diferentes pinchos, platos y menús que tendrán precios mui variaos, dende los dos a los 29 euros.