“Enforma ruiu por unes nueces” retoma les representaciones de la XIII Amuesa de Teatru Amateur d’Avilés

Güei, llunes 14 d’ochobre, a les 19 hores nel Centru Cultural Los Canapés, con entrada llibre y gratuita, Teatru l’Horru pon n’escena una comedia na que’l nuevu cura que llega al pueblu, d’idees progresistes, topeta col alcalde, conservador, nun duelu nel que salten chispes. Hasta final d’añu programarán cinco funciones más dientro del ciclu, incluyida la Gala Fin d’Amuesa del 16 d’avientu.

Tres el parón veraniegu, torna la programación de l’Amuesa de Teatru Amateur d’Avilés, na so XIII edición. La compañía valdesana Teatru L’Horru va poner n’escena “Enforma ruiu por xunes nueces”, güei, llunes 14 d’ochobre, nel horariu habitual de les 19 hores nel Centru Cultural Los Canapés, con entrada llibre y gratuita hasta completar l’aforu.

Una obra costumbrista en tonu de comedia, na qu’un nuevu cura, Xuacu, d’idees izquierdistes, llega’l pueblu del que ye alcalde Antón, d’ideoloxía opuesta. De personalidaes poderoses, dende’l primer momentu topeten, nun duelu del que van saltar chispes.

Esti ye’l planteamientu de la obra, que’l so autor ye José Ramón Oliva, y na qu’intervienen Josefina Lombán, que ye de la mesma la directora, Juacu Fernández, Juanjo Tresguerres, Chusa Juarros y Sergio Korobov. Va Tener una duración d’unos 80 minutos.

L’Amuesa de Teatru Amateur, entamada pola conceyalía de Cultura d’Avilés, al traviés de la collaboración ente la fundación Municipal de Cultura y la Federación de Grupos de Teatru Amateur del Principáu d’Asturies (FETEAS), ye unu de los clásicos de la programación cultural de la ciudá, y da voz y espaciu a l’activa escena aficionada de la comunidá.

Ver más información y la programación completa