El VIII Salón del Llibru Iberoamericanu busca espardir redes pola diversidá cultural a entrambos llaos del atlánticu

El VIII Salón del Llibru Iberoamericanu de Xixón presentóse esta mañana cola intervención del so responsable l’escritor Luis Sepúlveda, la conceyal de Cultura del conceyu, Mercedes Álvarez y la directora de la Obra Social y Cultural de Cajastur, Regina Rubio. Dedicada a la diversidá cultural y al espardimientu de redes comunes a entrambes orielles del atlánticu, la edición d’esti añu va celebrar el viernes 13 “La noche de las palabras”, un festival múltiple de creación literaria y artística pelos espacios públicos de la ciudá.

L’escritor Luis Sepúlveda afirmó na presentación que l’alcuentru de Xixón “nun ye un festival lúdicu, como otros que puedan desenvolvese perende aculló, sinón un alcuentru profesional ente autores y editores”, sicasí, añadió “tamién busca la implicación de la ciudá onde s’entama y crear un campu de debate onde se crucen les idees”. El director del Salón congratulóse de “los cambios políticos y sociales ocurríos n’España nos últimos tiempos que faciliten una mayor comunicación con Latinoamérica y el desenvolvimientu de los procesos de democratización en tol continente” y dixo que l’alcuentru lliterariu de Xixón “quier tamién espeyar nos sos debates esi nuevu espaciu abiertu a les idees democratizadores”.

Mercedes Álvarez, conceyal de Cultura del conceyu, quixo resaltar les novedaes que presenta esta VIII edición del Salón del Llibru Iberoamericanu, ente elles la celebración de “La noche de las palabras”, una esperiencia multidisciplinar que va entamase a lo llargo de la tarde y la nueche d’esti viernes 13 nuna docena d’espacios públicos de la ciudá y na que van desarrollase cincuenta y dos actividaes. Llectures, talleres de creación, escritura de poemes na playa de San Llorenzo, intervenciones artístiques, un “tendíu poéticu”, música, teatru, esposiciones y danza na cai, son delles de les actividaes que van convertir per una nueche Xixón “na ciudá blanca de la lliteratura”, en palabres d’Álvarez. La responsable de Cultura del Conceyu destacó tamién la colaboración de distintes asociaciones y entidaes xixoneses na celebración de “La noche de las palabras”, ente elles el Conservatoriu de Música, la Escuela Superior d’Arte Dramáticu d’Asturies, l’Asociación Espaciu de Creación y Didáctica, l’Atenéu Obreru o los comercios y llibreríes de Xixón.

El VIII Salón del Llibru Iberoamericanu inaugúrase esti xueves 12 al meudía cola presencia del conseyeru de Xusticia y Esteriores del Principáu Francisco José García Valledor, el director de Promoción Cultural y Política Llingüística, Carlos Madera y el director de l’Axencia pal Desarrollu de la Comunicación y Proyectos Culturales, Jorge Fernández León.