El vídeoclip de ¡Préstame pola vida! fai anuncia del VII Día de la Reciella

Esti próximu domingu 13 d’ochobre va celebrase otra vuelta’l Día de la Reciella y vieno acabante preséntase’l vídeoclip de ¡Préstame pola vida!, el tema promocional d’esta edición 2019 interpretáu por Muga y el corín de Reciella.

El Día de la Reciella ye un eventu festivu de tipu familiar entamáu pola asociación Reciella (families pol asturianu), nel que nun día completu, dende pela mañana hasta atapecer, sucédense actividaes variaes: talleres, conciertos, exhibiciones deportives y la Entaína, una carrera familiar, ente otres que tienen toes como xuntura la utilización del asturianu como llingua vehicular.

Esti eventu gratuitu y abiertu, qu’axunta miles de personas, y que nesta edición de 2019 faise’l próximu domingu 13 d’ochobre, lleva celebrándose dende l’añu 2012 en Xixón, nel Muséu del Pueblu d’Asturies nel mes d’ochobre y dende hai 4 años la so promoción inclúi la publicación d’un cantar específicu fechu por un grupu o artista asturianu. En el año 2016 la canción del Día de la Reciella fue ¡Entaína! de Skama la Rede y en 2017 “N’asturianu, sumes” de David Varela, en 2018 “Espoxiga” de Petit Pop.

En 2019, la canción ye ¡Préstame pola vida! un títulu que remite al lema del VII Día de la Reciella (¡N’asturianu presta pola vida!) y que ta interpretáu por Muga (Alicia Álvarez y David Guardado) y el corín de Reciella. El tema, con música y lletra d’Alicia Álvarez, foi grabáu por Pedro Vigil y nel mesmu participa tamién Mar Álvarez aportando coros y teclados.

El vídeo que ta disponible na rede (https://youtu.be/_q6_NtRyZ58) foi dirixíu por Pablo A. Quiroga Prendes, con post-producción dixital de Juan Tizón y la so grabación realizóse nel Muséu del Pueblu d’Asturies (Xixón) y Candás, participando nél los intérpretes y families de l’asociación Reciella.

La lletra, fai referencia a les llingües tanto como elementu de comunicación a traviés de les que se pue espresar cualquier tipu d’esperiencia, como a la emoción y el sentimientu de pertenencia que lleven arreyaes, especialmente si falamos del so usu en familia.

Dende Reciella faise un llamáu a families, neños y neñes para que vayan practicando’l cantar pa poder cantalu toes y toos xuntos el domingu 13 d’ochobre en Xixón en el VII Día de la Reciella.

LLETRA ¡PRÉSTAME POLA VIDA!

Préstame pola vida dicítelo n’asturianu

Voi garrate de la mano y falate a la oreyina.

Qu’hai más mares que el que ves equí. – ¡siete!

Y el picu más altu ta a 8000 metros de ti. – ¡l’Everest!

Los polos son de xelu anque yos-dea tol solín

Y cuando equí ye branu, ye iviernu n’otru país.

Y a mín, y a mín…

Préstame pola vida dicítelo n’asturianu

Voi garrate de la mano y falate a la oreyina.

Qu’hai volcanes que se echen a dormir – ¡Volcanes durmientes!

Y munches, munches llingües, hai lo menos 5000 – ¡Vuala!

Los osos aguanten 5 meses ensin comer.

Y les caparines duermen xuntes a la vez

Préstame pola vida dicítelo n’asturianu

Voy garrate de la mano y falate a la oreyina.