El V Festival de Cine Asturianu celebra güei la so Gala de Pieslle

El Festival de Cine Asturianu presentó ayeri martes los curtios nominaos al Premiu al Meyor Curtiumetraxe en castellán nel Teatru Filarmónica. La gala, presentada por María Xesús Rodríguez y Jesús Menéndez, cuntó tamién col estrenu de la obra “De rebaxes na sablera” pol Grupu Teatru de Güeñu. Güei miércoles va celebrase la Gala de Pieslle nel mesmu teatru y cola entrega de los premios del xuráu nesta edición de 2009. Amás, va entregase’l Premiu d’Honor a l’actriz y cantante Lilián de Celis.

La gala va entamar a partir de les 6 de la tarde y va tar presentada por Pepa Martínez, de la compañía Teatru de Güeñu y por José Manuel García, conocíu y veteranu presentador d’eventos musicales. Nesta Gala del Cine Asturianu cuntaráse coles actuaciones musciales de Celia González y del gaiteru Pelayu Cuaya amás de les coreografíes del Ballet Baidán d’Uviéu que dirixe Amparo Villafruela. La entrada ye llibre y de baldre, hasta la fin de les places.

Van presentase los curtios ganadores na categoría d’asturianu y castellán, y a les diez de la nueche, va estrenase la obra teatral “El misteriu del pelu roxu”.

Los nominaos al Premiu al Meyor Curtiumetraxe en Castellanu son: Juega conmigo (José Bors, 2004), Ella (Jesús Álvarez, 1999), Propiedad Privada (Ángeles Muñiz, 2006), Salvemos el teatru (Xavi Vilareyo, 2009), Polillas (Pedro Touceda, 2007), Lebensraum (Daniel Valledor, 2007), Normas de la casa (Eva Gallego, 2008), Ingredientes (Rebeca Iglesias, 2007). Los nominaos al Meyor Documental son: Ensin xéneru de duldes (Worldtv-Europe, 2008) y Voces en imágenes (Verité, 2008). Les nominaes a la Meyor Película esti añu son: Oviedo express, La torre de Suso y El orfanato.

Los miembros del xuráu nesta edición fueron: Illán Gonzali, espertu en realización y postproducción audiovisual; Ana Cárdenas, documentalista de cine y televisión que trabayó pa la Filmoteca Eespañola y Sara López, ex-programadora de festivales de cine en Madrid.