El Tribunal Superior de Xusticia acaba cola desixencia d’un mínimu d’escolinos pa dar clas d’asturianu en Secundaria

La resolución de 2008 de la Conseyería d’Educación qu’obligaba a la inscripción d’un númberu mínimu d’escolinos pa garantizar la clas d’asturianu na enseñanza obligatoria ye historia. El Tribunal Superior de Xusticia acaba poner sentíu común y llegalidá al pilancu más grave que se-y puinxere en democracia a la llibertá d’escoyeta de los pás no que cinca al asturianu.

La Sala de lo Contencioso Alministrativu del Tribunal Superior de Xusticia d’Asturies falló esti día a favor de la demanda interpuesta polos servicios xurídicos de CC.OO contra la resolución del 16 de mayu del 2008, de la Conseyería d’Educación y Ciencia, pola que s’establecía la ufierta y les condiciones pa la elección de materies optatives y materies opcionales pa la Educación Secundaria Obligatoria.

Na so sentencia, el Tribunal estima’l recursu interpuestu por CC.OO y declara nulu y ensin efectos por ser contrariu a drechu algún, l’artículu 5.1 de la resolución mentada qu’establecía un númberu mínimu d’ocho alumnos pa formar un grupu na asignatura de Llingua Asturiana na Educación Secundaria.

Según CC.OO, trátase d’una “reclamación histórica” pa garantizar el drechu a cursar l’asignatura de forma voluntaria, sin depender del númberu d’alumnáu que lo pida.

Nesta histórica sentencia, la Sala entiende que l’Alministración, al establecer un númberu mínimu pa formar un grupu, desvincúlase de la obligación que-y impón la Llei 1/1998 d’usu y promoción del bable-asturianu, de garantizar la so enseñanza en tolos niveles y graos. La sentencia tamién dexa claro que, por doctrina del Tribunal Supremu, nun pue desoyese’l mandatu llegal del artículu 10.1 de la Llei 1/1998 por razones presupuestaries.

El sindicatu desixe agora el cumplimientu “inmediatu” de la sentencia en tolos institutos qu’haya alumnáu deriváu a otres materies por nun cumplir col requisitu del númberu mínimu d’alumnos.