El Sidracrucis 2013 entama esti añu con “procesión” pel Barriu la Sidra de Xixón

La organización d’esti eventu tienlo claro “esta X edición del Sidracrucis superará toles anteriores, entamando con una procesión pel Barriu la Sidra, abierta a tol mundu”. Esti añu la que califiquen como “más fiestera, dura y esgotadora preba sidrera del añu” va amosar la so pasión pola sidra con esti pasucais tres un tonel de Sidra El Duque y los imprescindibles gaiteros y tamboriteros, que dirán aparando en caún de los siete chigres que conformen esta asociación pa dar tiempu a los participantes “a forrar con unos pinchinos”.

Tres la procesión sidrera empobinaráse a los participantes a la Primer Sidre l’Añu, nel Muséu del Pueblu d’Asturies, en Xixón, onde va facese la primer espicha y onde va tenese la oportunidá de prebar sidra d’un ampliu númberu de llagares y de degustar productos asturianos.

Tres esta primer espicha procederáse al tradicional percorríu de chigre en chigre, “col debíu y continuáu refuerzu del pinchéu que dirán sirviéndomos nos mesmos”. Visitaránse un par de llagares y finaráse con una espicha nun d’ellos pa finar a les diez de la nueche, hora de salida de los autobuses hacia los puntos d’orixe.

Remembrar qu’habrá serviciiu d’autobuses, con salida al menos dende Xixón, Uviéu y Avilés, dende onde recoyerán a los “esforciaos sidreros” ente les once y les doce del meudía, con destín a los primeros chigres, onde darréu entamará’l continuu repartu de culinos, “que sedrá costante a lo llargo de tola xornada”, espliquen.

El númberu de presones que pueden participar nesti eventu ta llendáu polo que ye imprescindible apuntase bien aína, darréu que se sigue un rigurosu orde d’inscripción. Pa facelo hai que ponese en contatutu con LA SIDRA nel teléfonu 652 59 49 83 o unviando un corréu a infolasidra@gmail.com