El Seminariu de Filoloxía Asturiana felicítase pol posicionamientu de la Xunta d’Escuela de Maxisteriu

El Seminariu de Filoloxía Asturiana de la Universidá d’Uviéu emitía esti día un comunicáu col que quier “faer pública la so satisfacción pol posicionamientu de la Xunta d’Escuela de Maxisteriu con relación a la propuesta de nueves titulaciones y felicita a los sos miembros pola so decisión al respective del status nelles de los estudios de Llingua Asturiana”. Coles mesmes, fai votos pa que, na nueva situación agora creada, “sía posible retomar la propuesta sobre’l particular del Departamentu de Filoloxía Española, ampliamente sofitada por tolos sectores implicaos, consistente nuna mención específica, de 30 creitos ECTS, necesarios y llegalmente requeríos pa la formación del profesoráu d’asturianu na eduación primaria. Esta carga docente, coherente colos 48 creitos ECTS del Minor acabante aprobar na Facultá de Filoloxía, conformaríen un marcu dignu pa los estudios universitarios d’asturianu y un primer pasu necesariu nel camín de la definitiva normalización del llabor docente ya investigador na nuesa disciplina na Universidá d’Uviéu”.

Otra manera, el Seminariu de Filoloxía Asturiana “tampoco nun puede dexar d’espresar el so pesar más fondu pol fallecimientu, nesti mesmu día, de don Emilio Barriuso Fernández, gran investigador y conocedor de la llingua marinera d’Asturies, a la que dedicó la mayor parte del so llabor académicu y una retafila de trabayos y publicaciones memorables ya indispensables pa toos aquellos que, anguaño o nel futuru, pretendan averase al so conocimientu o a la Filoloxía Asturiana como conxuntu”.