El rector entama a desdecíse de les sos promeses de campaña pa col asturianu

El nuevu Rector de la Universidá d’Uviéu, foi entrugáu esti llunes, na constitución del Claustru Universitariu, por un miembru de Fai! sobre les midíes, no que cinca a la normalización llingüística, que se comprometiere durante la campaña electoral a llevar alantre, pidiendo información sobre cuáles diben ser y cuándo diben entamar y la rempuesta del Rector, descrita por FAI na so páxina web ye nidia de que vieno acabante d’entamar a desdecíse de les sos promeses.

Sigún asoleya la organización estudiantil na só páxina web, “un representante de Fai! nel Claustru -l’únicu miembru del sector d’estudiantes qu’intervino- instó al nuevu Rector a que se pronunciare sobre les necesaries midíes qu’han desendolcase pa la normalización llingüística del idioma na universidá asturiana, l’usu alministrativu, la visibilización esterna de la llingua en toles estayes de la institución asina como pola urxente falta de resolución del conflictu coles titulaciones de Filoloxía Asturiana y el títulu d’espertu en Llingua Asturiana en Maxisteriu.

La rempuesta per parte de V.Gotor pasa por aparcar, pel momentu, el tema de les nueves titulaciones de filoloxía y maxisteriu énte la reforma y adaptación al EEd’ES (Espaciu Européu d’Educación Superior) d’estos títulos propios y, en resume, reduz la política llingüística, a la presencia del asturianu, xunto col inglés, nel web de la Universidá y a que se permita a los investigadores l’usu del idioma asturianu nos sos trabayos d’investigación, siempre acordies cola calidá certificada de los mesmos, ensin esclariar custiones tan importantes como si va haber una planificación global en materia llingüística col so presupuestu asignáu, qué decisiones se van tomar pa evitar cualquier tipu de discriminación por mor del usu de la llingua asturiana, qué posición va defender el Rector no tocante a los títulos de o cuándo van entamar a ponese en marcha eses midíes.”