El PSOE gana les europees n’Asturies col 43’2% de los votos | Fracasu de les candidatures asturianes

Pese a la derrota del PSOE nel estáu español, con cuasi 600.000 votos y dos eurodiputaos menos que’l PP, n’Asturies, los socialistes siguen calteniéndose como la primer fuercia, con 179.943 votos y el 43,12% de votos, frente a los 177.329, el 42’5%, del Partíu Popular. Izquierda Xunida-Bloque por Asturies consigue 23.956 votos, el 5’74% del total; y UPyD consolídase como la cuarta fuercia n’Asturies con 17.617 votos, el 4’22%. En quintu y sestu llugar apaecen Los Verdes-Grupu Verde Européu y el Partíu Antitaurinu contra’l Maltratu Animal, con 1.966 y 1.310 votos respectivamente.

La dixebra de los escasos votos nacionalistes n’Asturies lleva a que tenga de dise hasta’l sétimu puestu pa conocer los resultaos del primer partíu asturianu en votos, Unidá Nacionalista Asturiana, que consigue namás 846 votos, el 0’20% de los votos asturianos. Darréu Iniciativa Internacionalista-La Solidaridá ente los Pueblos algama venti votos menos, 826, y el 0’20% de los votos. El PCPE fízose con 779 votos, el 0’19% de los votos; y Andecha Astur, 765 votos, el 0’18%.

Los resultaos de los partíos asturianos amuesen un descensu perimportante con respectu a les elecciones europees de 2004, onde’l PAS, que nesta ocasión nun se presentó, recibiere 2.098 votos, el 0’48% de los emitíos entós, y la coalición Europa de los Pueblos, onde entós diba Andecha Astur, 1.677 votos, el 0’38%, más que la suma actual ente esti últimu partíu y Unidá Nacionalista Asturiana (UNA).

Los eurodiputaos asturianos presentaos nes llistes de los grandes partíos estatales, Antonio Masip, pol PSOE y Salvador Garriga, pol PP, van tar nel Parllamentu Européu. Sicasí, la candidata asturiana d’Izquierda Xunida-Bloque por Asturies, que diba nel tercer puestu de la llista, Marta Pulgar, nun consiguió facese col acta d’eurodiputada.

Asturies quédase nesta ocasión ensin representación de partíos d’ámbitu asturianu nel Parllamentu Européu, dempués d’unes elecciones marcaes pol enfrentamientu abiertu ente les mesmes.

Consulta los resultaos oficiales