El programa Saustrela de la televisión vasca vien a Asturies pa entrevistar a Xuan Bello

El programa Saustrela d’EITB, la radiotelevisión pública vasca, prepara un reportaxe sobre l’escritor Xuan Bello y un equipu d’esti espaciu dedicáu a la lliteratura va treslladase hasta Uviéu nos vinientes díes col fin d’entrevistar al autor de “Paniceiros”. Nel reportaxe, que va ser emitíu en feches prósimes, diversos autores contemporáneos del poeta y narrador asturianu van intervenir coles sos opiniones alrodiu de la obra de Bello y del panorama lliterariu na nuestra llingua.

L’interés y l’atención pola obra del escritor de Paniceiros cuantayá tien trespasao les llendes naturales de la llingua asturiana pa convertise nuna referencia imprescinidible de les lliteratures ibériques. Atraíos pola figura d’un autor qu’algamó l’ésitu editorial y la reconocencia lliteraria escribiendo nuna llingua como l’asturiana, que nin siquier tien categoría d’oficial, los responsables de Saustrela, un espaciu dedicáu a la lliteratura de la televisión vasca, preparen un programa nel que Xuan Bello

va ser entrevistáu pa falar de les claves de la so obra. Contemporáneos del poeta de Paniceiros como Antón García, Berta Piñán, Esther Prieto, Ana Vanessa Gutiérrez y Pablo Antón Marín Estrada van intervenir tamién nel reportaxe aportando coles sos opiniones un afondamientu na figura de Bello pa los espectadores vascos.

Un equipu del programa Saustrela treslládase dende San Sebastián a Uviéu el prósimu viernes 27 pa rodar a lo llargo del fin de selmana l’espaciu dedicáu al autor de “Hestoria universal de Paniceiros” y “El llibru vieyu”. Los llugares sentimentales del escritor nel corazón vieyu de la ciudá onde vive van ser los escenarios onde va rodase esti reportaxe de la televisión pública vasca.