El programa d’intercambiu de llibros en Xixón preve superar los 4.200 participantes

El programa d’intercambiu de llibros en Xixón preve superar los 4.200 participantes depués de qu’entamara la entrega de volumes per parte de les families esti llunes, 1 de xunetu, nel Conseyu de la Mocedá.

«Esti programa supón un importante aforru para les families. Pidimos que se curien los llibros». Asina lo indica Luis Martínez el coordinador de la iniciativa qu’anguaño celebra la so ventiava primer edición y qu’entamó esti  llunes, 1 de xunetu, la so recoyida de llibros xuntu cola entrega de vales. El puntu d’intercambiu va ser nos locales del Conseyu de la Mocedá, nel espaciu Astragal, con entrada pela avenida de la Constitución, númberu 45.

Son cuatro los oxetivos a consiguir al traviés d’esti programa. «El primeru, l’intercambiu de llibros de testu de manera gratuita, como recursu complementariu a otres iniciatives desenvueltes,para cubrir la demanda de solicitantes. Contribuyir a xenerar un modelu de desenvolvimientu más sostenible, basáu n’estratexes de reutilización de los manuales y l’amenorgamientu de borrafes frente a los modelos d’un solu usu.

Per otra parte, reivindicar el derechu a una educación gratuita n’Asturies conforme a lo establecío na Constitución», esplica Martínez. «Tamién, queremos dar respuesta dende l’ámbitu educativu, a la situación d’emerxencia social na que s’atopen numberoses families de resultes de la violencia de xéneru y de les polítiques de retayu aplicaes mientres los últimos años poles alministraciones públiques, ente otros casos», indica’l coordinador de la iniciativa.

La primer fase del programa d’intercambiu de llibros de testu va tener llugar dende’l 1 al 31 de xunetu, cuando se va efectuar la so recoyida y l’entrega de vales, ente les 10 y les 14 hores. La recoyida de llibros va siguir, na segunda fase del procesu, dende’l 19 d’agostu al 30 de setiembre y, tamién va empezar nestes feches la entrega de manuales. L’horariu n’agostu va ser dende les 10 hasta les 14 hores y nel mes de setiembre caltendrá esti horariu de mañana y pela tarde va ser de 17 a 19 hores. La tercera y última etapa d’esta iniciativa va tener llugar dende’l 1 al 15 d’ochobre n’horariu de 17 a 19 hores, na que se va realizar la recoyida y entrega d’exemplares. Esta última fase, conocida como ‘matrícula viva’, «al desconocimientu del llistáu de llibros por distintos motivos, como’l cambéu de centru de dellos alumnos», esplica Martínez.